الیکشن کمیشن نے ارکان پارلیمان سے سالانہ گوشوارے طلب کرلیے

الیکشن کمیشن آف پاکستان (ای سی پی) نے ارکان پارلیمنٹ اور صوبائی اسمبلی سے سالانہ گوشوارے طلب کرلیے ہیں۔

ای سی پی کے اعلامیے کے مطابق ارکان پارلیمنٹ اور صوبائی اسمبلی اپنے سالانہ گوشوارے 31 دسمبر تک جمع کرائیں۔

اعلامیے میں کہا گیا کہ ارکان پارلیمنٹ و صوبائی اسمبلی اپنے زیر کفالت اہلخانہ کے گوشوارے بھی جمع کرائیں، غلط گوشوارے جمع کرانے پر کرپٹ پریکٹسز کے تحت کارروائی ہوگی۔

اعلامیے کے مطابق ارکان پارلیمنٹ اور صوبائی اسمبلی اپنے واجبات کی تفصیلات بھی جمع کرائیں۔

ای سی پی اعلامیے کے مطابق الیکشن کمیشن نے تمام ممبران اسمبلی، سینیٹرز کو مراسلہ ارسال کردیا، جس میں واضح طور پر کہا گیا ہے کہ 15 جنوری 2023 تک تفصیلات جمع نہ کرانے والے اراکین کی رکنیت معطل کر دی جائے گی۔

بشکریہ جنگ