افغانستان نے نمیبیا کو جیت کیلئے 161 رنز کا ہدف دیدیا

مینز ٹی ٹوئنٹی ورلڈکپ 2021 کے گروپ 2 کے میچ میں افغانستان نے نمیبیا کو جیت کے لیے 161 رنز کا ہدف دے دیا۔

ابوظبی میں کھیلے جارہے اس میچ میں افغانستان نے ٹاس جیت کرپہلے بیٹنگ کرنے کا فیصلہ کیا تھا۔ 

نمیبیا کے بولرز نے اچھی گیندبازی کرتے ہوئے افغانستان کے بیٹرز کو مشکلات کا شکار کیا، تاہم افغان بیٹسمین اپنے تجربے کو بروئے کار لاتے ہوئے رنز بناتے رہے۔ 

پہلے اوپننگ بیٹسمین حضرت اللہ زازئی نے 33 رنز کی اننگز کھیلی جس کے لیے انہوں نے 27 گیندوں کا سہارا لیا، ان کے ساتھ آنے والے محمد شہزاد نے 33 گیندوں پر 45 رنز بنائے۔ 

اپنے کیریئر کا آخری میچ کھیلنے والے اصغر افغان نے 23 گیندوں پر 31 رنز بنائے جبکہ کپتان محمد نبی نے پھر عمدہ بیٹنگ کا مظاہرہ کرتے ہوئے 17 گیندوں پر 32 رنز بٹورے۔

تمام بیٹرز کی ذمہ دارانہ بیٹنگ کی بدولت افغانستان کی ٹیم مقررہ 20 اوورز میں 5 وکٹوں کے نقصان پر 160 رنز بناسکی۔ 

بشکریہ جنگ