اس بار بلدیاتی انتخابات ملتوی ہوئے تو مزاحمت کرینگے: حافظ نعیم الرحمٰن

امیرِ جماعتِ اسلامی کراچی حافظ نعیم الرحمٰن کا کہنا ہے کہ اس بار بلدیاتی انتخابات ملتوی ہوئے تو جماعتِ اسلامی مزاحمت کرے گی۔

کراچی میں پریس کانفرنس کرتے ہوئے امیرِ جماعت اسلامی کراچی حافظ نعیم نے کہا ہے کہ شہر بھر میں کے الیکٹرک کا راج قائم ہے، بلوں کی ادائیگی کے حوالے سے عوام سے رائے لیں گے۔

انہوں نے کہا کہ 28 اگست کو سندھ میں دوسرے مرحلے کے بلدیاتی انتخابات ہونے ہیں، اس سے قبل بارش کو جواز بنا کر الیکشن ملتوی کرائے گئے۔

امیرِ جماعتِ اسلامی کراچی حافظ نعیم الرحمٰن نے کہا ہے کہ آج تک کراچی میں پیپلز پارٹی کا غیر قانونی سیاسی ایڈمنسٹریٹر ہے، الیکشن کمیشن اور انتظامیہ بھی پیپلز پارٹی کی آلۂ کار ہے۔

حافظ نعیم الرحمٰن نے کہا کہ کراچی میں اب بلدیاتی انتخابات ملتوی کرانے کا کوئی جواز نہیں، البتہ حیدر آباد اور بدین میں سیلابی کیفیت کے باعث الیکشن ملتوی کرنا بنتا ہے۔

ان کا کہنا ہے کہ صوبائی حکومت اس سے قبل بھی 2 سال سے بلدیاتی الیکشن ملتوی کرواتی رہی ہے، کراچی کو میئر سے محروم رکھنے کے بہانے کیے جا رہے ہیں۔

امیرِ جماعتِ اسلامی کراچی نے کہا کہ کے الیکٹرک سے جماعتِ اسلامی کے سوا تمام جماعتوں کو ریلیف ملتا ہے، عارف نقوی عمران خان سمیت نواز شریف کے قریبی ساتھی ہیں۔

انہوں نے مزید کہا کہ فیول ایڈجسٹمنٹ کے نام پر شہریوں کو لوٹا جا رہا ہے، آئی ایم ایف کے کہنے پر عوام کا خون نچوڑا جا رہا ہے۔

امیرِ جماعت اسلامی کراچی حافظ نعیم الرحمٰن نے کے الیکٹرک کے خلاف عدالت جانے کا اعلان کیا اور کہا کہ عدالتوں کو بھی اب کے الیکٹرک کو اسٹے نہیں دینا چاہیے، بلوں کی ادائیگی کے حوالے سے جلد عوامی رائے لینا شروع کریں گے۔

بشکریہ جنگ