اس بار انشاء اللّٰہ ورلڈ کپ اور ایشیا کپ جیتیں گے، شاہین شاہ آفریدی

پاکستان کرکٹ ٹیم کے فاسٹ بولر شاہین شاہ آفریدی نے کہا ہے کہ اس بار انشاء اللّٰہ ورلڈ کپ اور ایشیا کپ جیتیں گے۔

جیو نیوز کو انٹرویو دیتے ہوئے شاہین شاہ آفریدی نے کہا کہ انجری ہونا کسی بھی اسپورٹس میں کے کیریئر کا حصہ ہے، مشین بھی کبھی کبھار خراب ہو جاتی ہے۔

شاہین شاہ آفریدی کا کہنا ہے کہ انجری میں گزارا وقت کافی مشکل تھا، انجری کے دوران کافی کچھ سیکھا تھا، امید ہے کہ پاکستان کے لیے پرفارمنس کا سلسلہ جاری رکھوں گا۔

انہوں نے کہا کہ اب کافی فٹ محسوس کر رہا، آپ کے سامنے ہے کتنا بھاگ رہا، کوشش ہے تینوں شعبوں میں اچھی کارکردگی کا مظاہرہ کروں، اگر نئے گیند سے شروع میں ایک دو وکٹ لیں تو حریف مشکل میں آ جاتا ہے۔

پاکستان انٹرنیشنل کرکٹ کونسل (آئی سی سی) کی ون ڈے رینکنگ میں پہلی پوزیشن پر آگیا۔

ان کا کہنا ہے کہ کوشش ہوتی ہے ہمیشہ ٹیم کیلئے اپنا بہترین دوں، پہلا اوور ہو، دوسرا ہو یا آخری، میرا کام حریف پر وار کرنا ہے، ورلڈ کپ سے قبل ون ڈے میچز ہمارے لیے کافی اہم ہیں،امید ہے ورلڈ کپ میں ہماری اچھی پرفارمنس آئے گی۔

فاسٹ بولر نے کہا کہ کسی بھی ایونٹ میں شروع میں نیٹ رن ریٹ خراب ہوجائے تو آخر میں نقصان ہوتا ہے، اگر شروع ہی سے ٹاپ کرکٹ کھیلیں تو بعد میں مسئلہ نہیں ہو، بطور ٹیم اچھا کھیل کر پاکستان کو فائنل جتوانے کی کوشش کریں گے۔

شاہین شاہ آفریدی کا یہ بھی کہنا ہے کہ بھارت میں کنڈیشن ہمارے لیے زیادہ مختلف نہیں ہوں گی، امید ہے وہاں کی کنڈیشنز کا فائدہ اٹھانے کی کوشش کریں گے۔

بشکریہ جنگ