اسٹیڈیم ہنگامہ آرائی، PCB کا متعلقہ حکام کے سامنے معاملہ اٹھانے کا فیصلہ
پاکستان کرکٹ بورڈ نے گزشتہ روز افغان شائقین کی جانب سے اسٹیڈیم میں کی جانے والی ہنگامہ آرائی کا معاملہ متعلقہ حکام کے سامنے اٹھانے کا فیصلہ کیا ہے۔
پاکستان کرکٹ ٹیم کے میچز میں حالیہ برسوں کے دوران ہنگامہ آرائی کے متعدد واقعات پیش آ چکے ہیں۔
پاکستان کرکٹ ٹیم کا افغانستان کے خلاف ورلڈ کپ 2019ء میں لیڈز میں ہنگامہ آرائی ہوئی، دبئی میں گزشتہ برس ٹی ٹوئنٹی ورلڈ کپ میں بھی افغانستان کے خلاف میچ میں ہنگامہ آرائی ہوئی تھی۔
اسی طرح ایشیا کپ میں گزشتہ روز ہونے والے افغانستان کے خلاف میچ میں بھی اسٹیڈیم کے اندر اور باہر ہنگامہ آرائی کے واقعات پیش آئے۔
پی سی بی ذرائع کے مطابق پاکستان کرکٹ بورڈ پاکستانی فینز کے ساتھ پیش آنے والے واقعات سے ناخوش ہے، پاکستان کرکٹ بورڈ نے سخت الفاظ میں احتجاج ریکارڈ کرانے کا فیصلہ کیا ہے۔
پی سی بی ذرائع کا بتانا ہے کہ پہلے مرحلے میں پاکستان کرکٹ بورڈ خط کے ذریعے تشویش کا اظہار کرے گا، پی سی بی آئی سی سی، اے سی سی اور شارجہ کرکٹ کونسل کو خط لکھے گا۔
پی سی بی ذرائع کے مطابق دوسرے مرحلے میں پی سی بی مختلف اجلاسوں میں معاملے کو اٹھائے گا۔
پی سی بی کا کہنا ہے کہ فینز کے ساتھ تین مرتبہ ناخوشگوار واقعات ہوئے جو ناقابلِ برداشت ہیں، فینز کو غیر محفوظ نہیں بنا سکتے، ان کی حفاظت کے لیے پی سی بی اقدامات کا مطالبہ کرے گا۔
پی سی بی کی جانب سے لکھے گئے خط میں مؤقف اختیار کیا گیا ہے کہ پاکستان کے میچز میں ایسے واقعات ناقابل قبول ہیں۔
Comments are closed.