اسمارٹ لاک ڈاؤن پر فی الحال غور نہیں کیا جا رہا، عبدالقادر پٹیل

وفاقی وزیر برائے صحت عبدالقادر پٹیل کا کورونا وائرس کی بڑھتی شرح کے پیشِ نظر کہنا ہے کہ این ڈی ایم اے اور متعلقہ اداروں کی تیاری مکمل ہے، تاہم اسمارٹ لاک ڈاون پر فی الحال غور نہیں کیا جا رہا، امید ہے کہ اس کی ضرورت نہیں پڑے گی۔

عبدالقادر پٹیل نے پریس کانفرنس کے دوران کہا ہے کہ کورونا وائرس سے اموات کی شرح 1.5 فیصد ہے، وینٹی لیٹرز کی مناسب تعداد اسپتالوں میں موجود ہے، اسپتالوں میں کورونا وائرس کے بڑھتے مریضوں کی تعداد پر تشویش ہے۔

سندھ بھر میں گزشتہ 24 گھنٹوں کے دوران کورونا وائرس کے 4 ہزار 826 ٹیسٹ کیے گئے جن میں سے 508 ٹیسٹ مثبت آئے ہیں۔

انہوں نے مزید کہا ہے کہ کراچی میں کورونا وائرس کے کیسز میں اضافے پر ٹیسٹنگ کی شرح بڑھا رہے ہیں، کورونا وائرس سے ویکسینیٹڈ افراد ملک کی کُل آبادی کا 86 فیصد ہیں۔

عبدالقادر پٹیل نے عوام سے اپیل کرتے ہوئے کہا ہے کہ شہری عید کے بعد سیاحتی مقامات پر رش سے گریز کریں۔

اُن کا یہ بھی کہنا ہے کہ کورونا کی ایس او پیز پر عمل درآمد کے لیے آگاہی مہم شروع کی جا رہی ہے، سماجی فاصلہ، سینیٹائزر اور ماسک کا استعمال یقینی بنائیں۔

بشکریہ جنگ