اسلام آباد میں راہ چلتی خاتون کو ہراساں کرتے شخص کی ویڈیو وائرل

اسلام آباد سے راہ چلتی خاتون کو ہراساں کرتے ہوئے ایک شخص کی ویڈیو سوشل میڈیا پر وائرل ہوگئی ہے۔

سوشل میڈیا پر وائرل اس ویڈیو میں دیکھا جاسکتا ہے کہ گلی میں سے گزرتی ہوئی ایک برقعہ پوش خاتون کو ایک نامعلوم شخص پیچھے سے آکر جھپٹتا ہے۔

جس کے بعد خاتون اس مرد کو اپنے آپ سے دور دھکیلنے کی کوشش کرتی ہے۔ 

ویڈیو کے آخر میں آدمی کو ہراساں کرنے کے بعد بھاگتے ہوئے بھی دیکھا جا سکتا ہے۔

یہ ویڈیو زوبیا خورشید نامی ایک صارف کی جانب سے مائیکروبلاگنگ ویب سائٹ ٹوئٹر پر شیئر کی گئی ہے۔

صارف نے اس ویڈیو کو شیئر کرتے ہوئے کیپشن میں لکھا کہ سیکٹر آئی 10 اسلام آباد میں درندہ صفت اس شخص کی حرکت دیکھیں۔

صارف نے اسلام آباد پولیس سے اس واقعے کا فوری طور نوٹس لینے کی اپیل بھی کی ہے۔

سینئر صحافی حامد میر نے بھی اس ویڈیو کو اپنے ٹوئٹر اکاؤنٹ پر پوسٹ کیا ہے۔

اُنہوں نے ویڈیو کو اپنے اکاؤنٹ پر ری ٹوئٹ کرتے ہوئے لکھا کہ ’یہ تصویر سب مردوں کے لیے ایک چیلنج ہے، ہمیں اپنی ماؤں، بہنوں اور بیٹیوں کی عزت کی خاطر اس شخص کو ڈھونڈ کر عبرت کی مثال بنانا چاہیے ورنہ کل کو یہی واقعہ آپکے گھر کے سامنے بھی ہو سکتا ہے‘۔

بشکریہ جنگ