اسلام آباد کے کسی بھی سرکاری اسپتال میں ایم آر آئی مشین نہ ہونیکا انکشاف

سینٹ قائمہ کمیٹی صحت کے اجلاس میں انکشاف ہوا ہے کہ اسلام آباد کے کسی بھی سرکاری اسپتال میں ایم آر آئی مشین نہیں ہے۔

اجلاس میں پمز حکام نے بتایا کہ پمز اسلام آباد میں ایم آر آئی مشین ایل سیز نہ کھلنے کے باعث نصب نہیں ہو سکی، فروری 2001ء سے اب تک اسپتال میں ایم آر آئی کی سہولت میسر نہیں۔

ڈاکٹر عائشہ عیسانی کا کہنا ہے کہ پمز کے لیے ایم آر آئی مشین کا مقناطیس منگوایا جا چکا ہے۔

انہوں نے کہا کہ 63 ہزار ڈالرز کی ایل سی نہ کھلنے پر ایم آرآئی مشین نہیں لگ سکی، ایم آر آئی مشین کے لیے چلر اور جنریٹر باہر سے منگوایا جانا ہے۔

سینٹ قائمہ کمیٹی صحت کے ممبران نے وفاقی وزارت صحت کی کارکردگی پر برہمی کا اظہار کیا۔

قائمہ کمیٹی نے وزیر صحت عبدالقادر پٹیل اور سیکریٹری صحت کی مسلسل غیرحاضری پر بھی برہمی کا اظہار کیا۔

وزیر صحت اور سیکریٹری کی عدم موجودگی کے باعث کمیٹی کا اجلاس پیر تک ملتوی کر دیا گیا۔

بشکریہ جنگ