اسلام آباد آنے کی بات کرتے ہیں یہ لاڑکانہ نواب شاہ جانے کے بھی نہیں، فواد چوہدری

وفاقی وزیر برائے اطلاعات فواد چوہدری کا کہنا ہے کہ زرداری صاحب نے اپنے قد سے بڑی بڑھکیں مارنی شروع کردیں،سندھ میں اگلی حکومت پی ٹی آئی بنائے گی، اسلام آباد آنے کی بات کرتے ہیں یہ لاڑکانہ نواب شاہ جانے کے بھی نہیں۔

فواد چوہدری نے زرداری کے اسلام جا کر حکومت سے مقابلہ کرنے کے اعلان پر ردّ عمل دیتے ہوئے کہا ہے کہ ہمارا مقابلہ بونوں کے ساتھ ہے، جب آپ کو عدالت جانا ہوتا ہے تو وہیل چیئر منگوالیتے ہیں، جب ضمانت ملتی ہے سانس لیتے ہیں اور قد سے زیادہ بڑی بھڑکیں مارنے لگتے ہیں۔

پاکستان پیپلز پارٹی کے شریک چیئرمین اور سابق صدر آصف علی زرداری کا کہنا ہے کہ لاہور اور اسلام آباد میں بیٹھ کر مخالفین کا مقابلہ کرنے جارہا ہوں، لاہور میں خیمے لگا کر احتجاج کروں گا

انہوں نے کہا کہ آج پیپلز پارٹی کے پاس پنجاب میں امیدوار نہیں ہیں، جبکہ مریم نواز کے پی میں اپنی شکست کا جشن منا رہی ہیں۔

انہوں نے مزید کہا کہ ان کی سیاست ٹی وی کے سہارے چل رہی ہے، گراؤنڈ پر نہیں، ان کی ٹی وی کوریج بند کردیں تو یہ ختم ہوجائیں گے۔

 فواد چوہدری نے کہا کہ پانچ سالوں میں 55 ارب ڈالر قرض واپس کرنے جارہے ہیں، ان لوگوں نے تو قرض لے کر ملک کا بیڑہ غرق کردیا ہے۔

وفاقی وزیر نے کہاکہ کے پی سے مسلم لیگ نون فارغ ہوگئی ہے، کسی نے ووٹ نہیں ڈالا، نوازشریف باقی زندگی پارک لین میں اور زرداری دبئی میں گزاریں گے۔

وزیرِ اعظم عمران خان کے معاونِ خصوصی برائے سیاسی روابط شہباز گِل کا کہنا ہے کہ زرداری صاحب کو جیسے ضمانت ملتی ہے بڑھکیں مارنا شروع کر دیتے ہیں، نون لیگ والے کرامتیں اور چڑھاوے نہ بتائیں رسیدیں دیں، جنید صفدر کی شادی پر اتنا پیسہ کس نے لگایا، کیا اتنا پیسہ کھوکھروں نے لگایا ؟ کیا وہ مئیر کے امیدوار ہیں؟۔

وفاقی وزیر نے کہاکہ کورونا جیسی بلا میں ملک کی معیشت میں بہتری آئی، پاکستان میں پہلی بار دس ڈیم بن رہے ہیں، ایک لاکھ 57 ہزار کمپنیاں پچھلے ڈھائی سال میں بنیں، جبکہ اس سال فصلوں کی پیداوار میں اضافہ ہوا ہے،کاروں، موٹرسائیکلوں اور زرعی بیج ادویات کی ریکارڈ سیل ہو رہی ہے۔

انہوں نے مزید کہاکہ پاکستان ایٹمی طاقت ہے، ملک کو کوئی خطرہ نہیں ہے۔

بشکریہ جنگ