فلسطینی مسلمان بسام ارامین اور اسرائیلی یہودی رامی ایلہنان نے اسرائیل حماس جنگ کے دوران اپنی جوان بیٹیوں کو کھویا ہے۔

دونوں اسرائیل میں رہتے ہیں جہاں اکثر افراد یہی سمجھیں گے کہ اس سانحے کے بعد وہ ایک دوسرے کے دشمن بن چکے ہوں گے لیکن بدلہ لینے کی بجائے بسام اور رامی نے ایک مختلف راستہ ڈھونڈا ہے، دوستی اور امن کا۔

ایک اسرائیلی فوجی نے بسام کی بیٹی ابیر کو اس وقت گولی مار کر ہلاک کیا تھا جب ان کی عمر صرف 10 سال تھی جبکہ رامی کی بیٹی سمادر 14 سال کی عمر میں حماس کی جانب سے کیے گئے خودکش دھماکے میں ہلاک ہو گئی تھیں۔

بسام اور رامی کا کہنا ہے کہ ’ناقابلِ برداشت درد‘ کے باعث دونوں ’بھائیوں‘ کے درمیان انتہائی مضبوط دوستی کا رشتہ قائم ہوا۔

رامی نے سوال کیا کہ ’ہم جانور نہیں ہیں ہم اپنا ذہن استعمال کر سکتے ہیں۔ اور پھر آپ اپنے آپ سے یہ سوال پوچھنا شروع کرتے ہیں کہ کیا کسی کو مارنے سے میری بیٹی واپس آ جائے گی؟‘

بسام کہتے ہیں کہ ’اگر آپ زمین سے صرف اسرائیلیوں کو ہی نہیں تمام یہودیوں کو بھی مٹا دیں تو مجھے میری بیٹی واپس نہیں مل سکتی۔‘

والدین کا سرکل

جب ان کی بیٹی ہلاک ہوئیں تو دونوں نے والدین کے لیے بنائے گئے ایک ایسے سرکل کا حصہ بنے جس میں ایسے افراد شامل تھے جنھوں نے اس تنازع میں اپنے بچے کھوئے تھے۔

رامی اسرائیلی فوج میں ایک سابق فوجی تھے اور بسام کو ایک لیڈر کے طور پر دیکھتے ہیں۔

رامی نے بی بی سی کو بتایا کہ ’میں اس دنیا میں جس شخص کے سب سے قریب ہوں وہ بسام ہیں۔۔۔ ہمیں ایک دوسرے کو سمجھنے کے لیے الفاظ کی ضرورت نہیں ہے۔۔۔ میں ان سے متاثر ہوں اور ان سے ہمت حاصل کرتا ہوں۔‘

بسام کو جوانی میں اسرائیلیوں پر گرینیڈ پھینکنے کے جرم میں جیل میں ڈال دیا گیا تھا تاہم ان کا رامی کے ساتھ رویہ اپنے بھائیوں جیسا ہے۔

بسام نے بی بی سی کو بتایا کہ ’ہم دونوں بھائی ہیں۔ ہمارا رشتہ اس تنازع سے بالاتر ہے کیونکہ ہمارے اقدار ایک جیسے ہیں۔ ہمیں انسانوں اور عام شہریوں کا خیال ہے، ہمیں جمہوریت اور آزادی کا خیال ہے۔‘

تشدد کا دائرہ

اسرائیل غزہ پر سات اکتوبر سے بمباری کر رہا ہے جس کے نتیجے میں 10 ہزار سے زیادہ فلسطینی شہری ہلاک ہو چکے ہیں۔ اسرائیل کے مطابق ایک ماہ پہلے ہونے والے حماس کے حملے میں 1400 اسرائیلی شہری ہلاک ہوئے تھے۔

بسام اور رامی اس مسلسل جاری رہنے والے تنازع کو ’تشدد کا دائرہ‘ قرار دیتے ہیں۔

سمادر کی ہلاکت کا واقعہ

یہ چار ستمبر 1997 کی بات ہے۔ سمادار یروشلم میں اپنے دوستوں کے ساتھ شاپنگ کر رہی تھیں جب ایک دھماکہ ہوا۔ رامی اور ان کی اہلیہ نوریت نے کئی گھنٹے تک اپنی بیٹی کو ڈھونڈنے کی کوشش کی۔

رامی اس لمحے کو یاد کرتے ہوئے کہتے ہیں کہ ’آپ ہسپتالوں کے چکر لگاتے ہیں، پولیس تھانوں میں جاتے ہیں۔ پھر آخرکار اس رات گئے آپ ایک مردہ خانے میں کھڑے ہوتے ہیں اور پھر بس۔۔۔ آپ ایک ایسا نظارہ دیکھتے ہیں جسے آپ اپنی پوری زندگی میں کبھی بھی نہیں بھلا سکتے۔

’آپ کو جس قسم کا غصہ آتا ہے وہ ناقابلِ برداشت ہوتا ہے۔ اور اصل یہی درد ہوتا ہے جو کبھی ختم نہیں ہوتا۔ یہ ہر منٹ کے 59 سیکنڈ آپ کے ساتھ رہتا ہے۔‘

اسرائیلی گولی بسام کی بیٹی کو کیسے لگی؟

رامی اور بسام کی پہلی مرتبہ سنہ 2005 میں ملاقات ہوئی تھی جو ایک امن قائم کرنے کے لیے کام کرنے والے ادارے کی تقریب میں ممکن ہو سکی۔

چھ جنوری 2007 کو بسام کی 10 سالہ بیٹی ابیر کو مقبوضہ غرب اردن میں اسرائیلی فوجی کی جانب سے چلائی گئی ربر کی گولی لگی اور اور وہ بری طرح سے زخمی ہو گئیں۔

وہ دو روز بعد ہسپتال میں دم توڑ گئیں۔ بسام کہتے ہیں کہ ’مجھے غصہ آتا ہے اور میں آج تک اس بارے میں غصے میں ہوں کیونکہ ہم سب انسان ہیں اور غصہ آنا ایک فطری عمل ہے۔‘

’بدلہ لینے سے درد کم نہیں ہوتا‘

بسام کہتے ہیں کہ ’لیکن میرا ماننا ہے اور میں یہ جانتا ہوں کہ بدلہ لینا مسئلے کا حل نہیں ہے۔ اس سے میری بیٹی واپس نہیں آئے گی۔‘

رامی اور ان کی اہلیہ بسام اور ان کے خاندان کے ساتھ ہسپتال میں موجود تھے اور وہاں والدین کے سرکل کی نمائندگی کر رہے تھے۔

رامی کہتے ہیں کہ ’میرے لیے یہ تجربہ ایسا تھا جیسے میں نے اپنی بیٹی کو دوسری مرتبہ کھو دیا ہے۔‘

دو روز بعد بسام نے دی پیرنٹس سرکل میں شمولیت اختیار کر لی۔

’تشدد کے دائرے‘ کو توڑنے کی ضرورت

بسام اور رامی اب ایک ٹیم بن کے کانفرنسز اور ریلیوں میں بات کرتے ہیں۔ بسام کہتے ہیں کہ ’اگر قبضہ نہ کیا جاتا تو ہمیں ایک دوسرے کو مارنے کی ضرورت نہ ہوتی اور یہ نسل در نسل دیکھنے کو مل رہا ہے۔ خون کا ایک سمندر بہہ چکا۔ اب بہت ہو چکا۔‘ یہاں بسام دراصل سنہ 1948 میں اس خطے پر اسرائیلی ریاست کے قیام کی بات کر رہے ہیں جو اس وقت تک فلسطین تھا۔

اسرائیلی یہودی کے لیے ’قبضے کرنے والی قوم‘ کا ذکر کرنا غیر معمولی ہے تاہم رامی اسرائیل کو ایسے ہی پکارتے ہیں۔

’ایک نسل کے لوگوں کا دوسری پر حاوی ہونا غیر معمولی ہے۔ اس کے علاوہ اس صورتحال میں قابض اسرائیلی غیر معمولی قوت ہیں۔ ہم نے اس صورتحال کے باعث اپنے بچے کھو دیے اور ہمیں اسے تبدیل کرنے کی ضرورت ہے۔‘

دونوں عموماً نوجوانوں سے بات کرتے ہیں، دونوں اطراف میں ہائی سکول کے بچوں سے۔ رامی کے مطابق ’یہ کسی آتش فشاں کے دہانے پر قدم رکھنے کے مترادف ہے۔۔۔ ان دونوں قوموں کے درمیان ایک خون کا سمندر موجود ہے اور بہت زیادہ جذبات بھی۔

’اس دوران ہمیں بہترین ردِ عمل ملا ہے۔ کبھی کبھار یہ بہت زیادہ مشکل ہوتا ہے۔ الزامات لگائے جاتے ہیں، گالیاں دی جاتی ہیں اور انتہائی جارحانہ رویہ دیکھنے کو ملتا ہے۔ لیکن اس کلاس کے آخر میں اگر صرف ایک بچہ بھی اس پیغام کے حق میں اپنا سر ہلا رہا ہو تو یہ معجزے سے کم نہیں۔

’ہم نے خون کا ایک قطرہ بچا لیا۔ آپ کو پتا ہے کہ یہودی مذہب میں ایک خون کا قطرہ پوری دنیا کے برابر سمجھا جاتا ہے۔‘

معاف کر دینا

حماس کے حملے کے بعد اسرائیل جوابی کارروائی کے بعد سے رامی کے مطابق امن کی بات کرنا خاصا مشکل ہو گیا ہے۔

انھوں نے بی بی سی کو بتایا کہ ’اس وقت فضا غم سے بہت بوجھل ہے۔‘

رامی بتاتے ہیں کہ انھیں لوگوں کی جانب سے نفرت انگیز پیغامات موصول ہوتے ہیں۔

’حماس کو کسی مکھی یا مچھر کی طرح نہیں ختم کیا جا سکتا۔ حماس ایک نظریے کا نام ہے۔ آپ کو جوہڑ کی صفائی کرنی ہے، مچھروں کو مارنے کا کوئی فائدہ نہیں۔‘

دیرپا امن

رامی اور بسام دونوں ہی اپنی زندگیوں میں دیرپا امن دیکھنے کے متمنی ہیں۔ بسام کا کہنا ہے کہ ’میں اپنی بیٹی کے قاتل سے عدالت میں ملا۔ میں اسے بھی ایک متاثرہ شخص کے طور پر دیکھتا ہوں۔ میں اس سے کہا کہ۔۔۔ ’تم نے کسی دشمن یا دہشتگرد کو قتل نہیں کیا، تم نے ایک 10 سالہ معصوم بچی کو ہلاک کیا۔‘

’وہ اپنی تعلیم، اپنے نظریے اور اپنی تاریخ کا شکار ہوا۔‘

انھوں نے یہ پیغام صرف اسرائیلیوں اور فلسطینیوں کے لیے نہیں بلکہ دنیا بھر کے تمام ایسے لوگوں کو دیا جو کسی تنازع یا جنگ کا حصہ ہیں۔

انھوں نے کہا کہ ’جب آپ خود کو اس نفرت اور بدلے کی آگ سے آزاد کر لیتے ہیں تو آپ ایک آزاد شخص بن جاتے ہیں۔ آپ کو کوئی قید نہیں کر سکتا اور آپ کا کوئی دشمن نہیں ہوتا جس پر آپ نے فتح حاصل کرنی ہو۔

’میں کوئی بزدل شخص نہیں ہوں۔ مجھے اگر بدلا لینا ہو تو میں کسی بھی رحم کے بغیر ایسا کر سکتا ہوں۔ لیکن اس سے کیا تبدیل ہو گا؟ کچھ بھی نہیں۔‘