اسد عمر کی کراچی میں ایم کیو ایم کے احتجاج پر تشدد کی شدید مذمت

وفاقی وزیر اسد عمر نے کراچی میں ایم کیو ایم کے احتجاج پر تشدد کی شدید مذمت کرتے ہوئے کہا کہ جمہوریت کے لبادے میں پیپلز پارٹی کا آمرانہ طرزِ حکومت نہایت قابل مذمت ہے۔

اپنے بیان میں اسد عمر نے کہا کہ دستور پاکستان شہریوں کو پرُ امن احتجاج کا حق دیتا ہے، طاقت کے استعمال سے حق اختلاف کو غصب کرنے کی روایت شرمناک ہے۔

 اسد عمر نے کہا کہ سندھ میں جماعتی راج کی بجائے پیپلز پارٹی آئینی حقوق کا احترام کرے، پولیس کو سیاسی جماعتوں کے بجائے سندھ میں جرائم کےخلاف استعمال کیا جائے۔

میٹروپول سگنل پر پولیس نے ایم کیو ایم کارکنوں کو وزیراعلیٰ ہاؤس جانے سے روکنے کی کوشش کی۔

واضح رہے کہ سندھ کے بلدیاتی نظام کے خلاف ایم کیو ایم پاکستان کی جانب سے کراچی میں وزیر اعلیٰ ہاؤس کے سامنے دھرنا دینے کے ساتھ احتجاج کیا گیا، پولیس نے ریڈ زون کی خلاف ورزی پر احتجاجی مظاہرین پر لاٹھی چارج اور شیلنگ کی۔

لاٹھی چارج کے نتیجے میں رکن سندھ اسمبلی سمیت کئی کارکنان زخمی اور گرفتار کر لئے گئے، وزیر اعلیٰ ہاؤس کے اطراف کا علاقہ میدان جنگ بنا رہا، آنسو گیس سے کئی مظاہرین کی حالت غیر ہو گئی۔

بشکریہ جنگ