اب 15 سال کے بچوں کو کورونا ویکسین لگے گی

پاکستان میں کورونا وائرس کی روک تھام اور اس سے بچاؤ کے لیے سر گرم نیشنل کمانڈ اینڈ آپریشن سینٹر (این سی او سی) کا کہنا ہے کہ کورونا وائرس کی ویکسین کے لیے عمر کی حد 15 سال کر دی گئی ہے۔

نیشنل کمانڈ اینڈ آپریشن سینٹر (این سی او سی) کے مطابق اب 15 سے 18 سال تک کی عمر کے افراد بھی ویکسین کے اہل ہیں۔

پاکستان بھر میں کورونا وائرس کے اب تک 26 ہزار 662 مریض انتقال کر چکے ہیں جبکہ کافی دنوں بعد مثبت کورونا کیسز کی شرح 6 فیصد سے کم ہو گئی۔

این سی او سی نے بتایا کہ 15 سے 18 سال تک کے بچوں کو فائزر ویکسین مفت لگائی جائے گی۔

نیشنل کمانڈ اینڈ آپریشن سینٹر کا کہنا ہے کہ 18 سال تک کے بچوں کی ویکسی نیشن کے لیے رجسٹریشن سرٹیفکیٹ لازمی ہو گا۔

دنیا بھر میں کورونا وائرس سے متاثرہ افراد کی تعداد 22 کروڑ 40 لاکھ 53 ہزار 437 تک جا پہنچی ہے جبکہ اس موذی وائرس سے اموات 46 لاکھ 21 ہزار 294 ہو گئیں۔

این سی او سی کے مطابق تمام مرکزی ویکسی نیشن مراکز پر فائزر ویکسین دستیاب ہو گی۔

نیشنل کمانڈ اینڈ آپریشن سینٹر (این سی او سی) کا یہ بھی کہنا ہے کہ موبائل ویکسی نیشن ٹیمیں اسکولوں اور کالجوں میں ویکسی نیشن کریں گی۔

بشکریہ جنگ