آپ دوسروں پر الزام لگاکر بری الذمّہ نہیں ہو سکتے، شیری رحمٰن کا عمران خان کے انٹرویو پر ردعمل

پیپلز پارٹی کی نائب صدر اور سینیٹر شیری رحمٰن نے کہا ہے کہ وزیراعظم اپنی 3 سال کی تباہ کاریوں کا الزام بھٹو اور شریف خاندان پر لگارہے ہیں، آپ دوسروں پر الزام لگا کر بری الذمہ نہیں ہو سکتے۔

سینیٹر شیری رحمٰن نے اپنے سلسلہ وار ٹوئٹس میں وزیر اعظم عمران خان کے انٹرویو پر ردعمل دیتے ہوئے کہا ہے کہ اپنی نااہلی کا الزام دوسروں پر ڈالنے کا بیانیہ بری طرح سے پٹ چکا ہے، آپ نے ملک کے مجموعی قرضوں میں 70 فیصد اضافہ کیا ہے۔

ان کا یہ بھی کہنا تھا کہ 20.7 ٹریلین روپے کے قرضے لیکر آپ دوسروں پر الزام ڈال رہے ہیں، آج ہفتہ وار رپورٹ میں مہنگائی کی مجموعی شرح 19.49 فیصد ہوگئی ہے۔

شیری رحمٰن نے کہا کہ 3 سال میں ریکارڈ قرضے، مہنگائی کا ذمہ دار بھی موجودہ حکومت نہیں کوئی اور ہے؟شاید ان کو ابھی تک احساس نہیں ہوا کہ یہ حکومت میں ہیں۔

واضح رہے کہ وزیراعظم عمران خان نے غیرملکی ٹی وی کو انٹرویو دیتے ہوئے کہا تھاکہ کوئی بھی معاشرہ قانون کی حکمرانی کے بغیر قائم نہیں رہ سکتا، کرپشن ملک کو تباہ کردیتی ہے، پاکستان میں وسائل کی کوئی کمی نہیں۔ پاکستان کی بدحالی کے ذمہ دار بھٹو اور شریف خاندان ہیں۔

بشکریہ جنگ