آج پی ٹی آئی کی جیت ہوگی: شیریں مزاری

پی ٹی آئی رہنما شیریں مزاری نے کہا ہے کہ پی ٹی آئی کم از کم 16-17 سیٹوں پر کامیاب ہوگی، جتنے ووٹرز نکل رہے ہیں وہ پی ٹی آئی کو ووٹ ڈال رہے ہیں، آج پی ٹی آئی کی جیت ہوگی۔

اسلام آباد میں پریس کانفرنس کرتے ہوئے شیریں مزاری نے کہا کہ کیا خیبرپختونخوا کے لوگوں کے لیے پنجاب نوگو ایریا بن گیا ہے؟ کہاں لکھا ہے کہ کے پی کے لوگ پنجاب نہیں جاسکتے۔

شیریں مزاری نے کہا کہ علی امین گنڈاپور کا اتنا خوف ہے کہ پنجاب داخلے پر پابندی لگا دی، یہ علی امین گنڈا پور سے خوفزدہ ہیں۔

اُنہوں نے کہا کہ بہت ہوگیا، اب ہم مزید برداشت نہیں کریں گے،  یہ جتنی مرضی دھاندلی کرلیں، ان کی سازش ناکام ہوگی۔

پی ٹی آئی رہنما نے مطالبہ کیا کہ پولیس اور الیکشن کمیشن قانون توڑنے والوں کو گرفتار کریں، یہ آئین کے آرٹیکل 16 کے خلاف ورزی کررہے ہیں۔

شیریں مزاری نے مزید کہا کہ آپ نے زلفی بخاری اور شہباز گل کو گرفتار کرنے کے لیے پولیس بھیج دی۔

بشکریہ جنگ