آج عمران نیازی سمیت پوری کابینہ کی شکلیں بتا رہی تھیں گل مک گئی ہے، سعید غنی

وزیر اطلاعات سندھ سعید غنی نے کہا کہ آج قوم نے شکست خوردہ سابق وزیراعظم عمران نیازی کا رونا دھونا سنا، آج عمران نیازی سمیت پوری کابینہ کی شکلیں بتا رہی تھیں کہ ’گل مک گئی ہے‘۔

وزیراعظم عمران خان کے ’امر بالمعروف‘ جلسے سے خطاب پر ردِ عمل دیتے ہوئے صوبائی وزیر کا کہنا تھا کہ ’خدا حافظ عمران نیازی۔‘

انہوں نے کہا کہ آج 10 لاکھ لوگوں نے نہیں، ملک بھر سے آئے چند ہزار افراد نے نیازی حکومت کا جنازہ پڑھا۔

وزیراعظم عمران خان نے کہا ہے کہ اپوزیشن لوگوں کو خریدنے کےلیے پیسے لگا رہی ہے، حکومت کیا جان بھی جاتی ہے تو جائے لیکن میں انہیں کبھی معاف نہیں کروں گا۔

ان کا کہنا تھا کہ ساری زندگی اسلامی احکامات کی دھجیاں اُڑانے والا نیازی، آج مذہب کا چمپیئن بننے کی کوشش کر رہا ہے۔

سعید غنی نے کہا کہ عمران خان نیازی نے آج بھی حسب روایت سوائے جھوٹ کے کچھ نہیں بولا، ڈھٹائی اور بے شرمی سے جھوٹ بولنے میں عمران نیازی کا کوئی ثانی نہیں۔

ان کا کہنا تھا کہ آج نیازی سمیت پوری کابینہ کی شکلیں بتا رہی تھیں کہ ’گل مک گئی ہے۔‘

وزیر اطلاعات سندھ نے کہا کہ نیازی کی سیاست کا آغاز جھوٹ سے، نیازی کی سیاست کا اختتام جھوٹ پر ہے۔

ان کا کہنا تھا کہ سب کو رُلانے کی بھڑکیں مارنے والا نیازی، آج گڑ گڑا کر رو رہا تھا۔

سعید غنی نے کہا کہ عمران نیازی کی عوام دشمن حکومت کو اتحادیوں اور اپنے ساتھیوں نے بھی چھوڑ دیا ہے۔ اس نے ملک کی معیشت کا جنازہ نکال دیا ہے، کرپشن کو پروان چڑھایا۔

انہوں نے یہ بھی کہا کہ عمران نیازی کے جانے کے بعد پاکستان تحریک انصاف (پی ٹی آئی) کی ہوشربا کرپشن کی کہانیاں عوام کے ہوش اُڑا دیں گی۔

بشکریہ جنگ