آئرلینڈ ویمن کرکٹر کی اردو سیکھنے میں دلچسپی

لاہور میں موجود آئرلینڈ ویمن کرکٹ ٹیم کی وکٹ کیپر بیٹر میری والڈرون نے کہا ہے کہ ابھی میں نے السلام علیکم اور شکرن سمیت چند الفاظ سیکھے ہیں، ہم دو ہفتے یہاں ہیں، اردو کے الفاظ سیکھوں گی۔

آئرش کرکٹر نے جیو نیوز سے خصوصی گفتگو میں کہا کہ ہمارے لیے یہ ایک اعزاز ہے کہ ہم پاکستان کا دورہ کرنے والی پہلی آئرش ٹیم ہیں۔

انہوں نے کہا کہ پاکستان میں سیریز کھیلنے کے لیے پُرجوش ہیں، ہمارا اب تک قیام شاندرا ہے، قذافی اسٹیڈیم میں آنا بھی اچھا لگا۔

میری والڈرون نے کہا کہ ون ڈے میچز آئی سی سی چیمپین شپ کا حصہ ہیں، ہم پوائنٹس حاصل کرنا چاہیں گے۔

انہوں نے کہا کہ یہاں کا موسم بالکل مختلف ہے، میں اس سے پہلے برصغیر میں کھیل چکی ہوں، سری لنکا اور بنگلادیش دو دو مرتبہ جا چکی ہوں، ورلڈ کپ کے لیے انڈیا بھی گئی لیکن کئی کھلاڑی پہلی مرتبہ اس خطے میں آئی ہیں، حال ہی میں ہمارا گروپ ابوظبی جاچکا ہے لیکن یہاں ویسی گرمی نہیں ہے۔

انہوں نے کہا کہ پاکستان میں مقامی کھانے بھی کھانے ہیں، پاکستان ٹیم کی منیجر نے مجھے ناشتے میں پراٹھا کھانے کا کہا، مجھے امید ہے جو کھاؤں گی وہ زیادہ مرچوں والا نہیں ہوگا۔

آئرلینڈ کی ویمن کرکٹ ٹیم 3 ون ڈے اور 3 ٹی ٹوئنٹی میچز کے لیے پاکستان کے دورے پر ہے، سیریز کا آغاز 4 نومبر سے قذافی اسٹیڈیم لاہور میں ہوگا۔

بشکریہ جنگ