سینیٹ الیکشن میں گیلانی کی کامیابی کیخلاف پی ٹی آئی کی درخواست مسترد

اسلام آباد ہائی کورٹ نے سابق وزیر اعظم یوسف رضا گیلانی کی کامیابی کے خلاف پاکستان تحریک انصاف کی درخواست مسترد کردی۔

ذرائع ابلاغ کے مطابق اسلام آباد ہائی کورٹ میں چیف جسٹس اطہر من اللہ کی زیرِ صدارت یوسف رضا گیلانی کی کامیابی کے خلاف درخواست کی سماعت ہوئی۔ سماعت پر وکلا نے اپنے اپنے دلائل مکمل کیے۔

جسٹس اطہر من اللہ نے تحریک انصاف کے رکن قومی اسمبلی علی نواز کی درخواست کو مسترد کرتے ہوئے خارج کردی۔

عدالت نے درخواست گزار سے کہا کہ آپ کا کیس الیکشن کمیشن میں چل رہا ہے پہلے اسی فورم کو استعمال کریں۔ علی نواز صاحب آپ اچھے اور قابل صلاحیت عوامی نمائندے ہیں۔

جسٹس اطہر من اللہ نے کہا کہ آپ ایسی درخواستیں یہاں کیوں لے کر آتے ہیں؟ اس موقع پر یہ رٹ قابل سماعت نہیں، غیرضروری طور پر عدالتوں کو سیاسی معاملات میں لانا ٹھیک نہیں۔

سینیٹ الیکشن 2021 میں یوست رضا گیلانی نے اسلام آباد کی نشست پر حکومتی امیدوار وزیر خزانہ حفیظ شیخ کو شکست دی تھی جس کے بعد تحریک انصاف کی جانب سے یہ الزام لگایا گیا کہ اپوزیشن نے ہمارے اراکین کو خریدا۔