دعا زہرا کے والد کی درخواست پر فیصلہ محفوظ

سپریم کورٹ کراچی رجسٹری نے دعا زہرا کے والد مہدی کاظمی کی دائر درخواست پر فیصلہ محفوظ کرلیا۔

مہدی کاظمی کی جانب سے سپریم کورٹ کراچی رجسٹری میں دائر درخواست پر جسٹس سجاد علی شاہ نے سماعت کی۔

دعا زہرا کے والد نے سپریم کورٹ کراچی رجسٹری میں ایک اور درخواست دائر کر دی۔

جسٹس سجاد علی شاہ نے ریمارکس دیئے کہ آپ کی درخواست پر آج ہی کوئی فیصلہ جاری کریں گے۔

عدالت عظمیٰ نے درخواست گزار کے وکیل کے دلائل سن کر فیصلہ محفوظ کرلیا۔

عدالت نے درخواست گزار دعا زہرا کے والد مہدی کاظمی سے آج ہوئی سماعت کے دوران استفسار کیا کہ دعا زہرا کی والدین سے ملاقات کرائی گئی تھی ؟

والد مہدی کاظمی نے عدالت کوجواب میں بتایا کہ 5 منٹ کے لیے پولیس کی موجودگی میں چیمبر میں ملاقات ہوئی۔

جسٹس محمد علی مظہر نے استفسار کیا کہ آپ نے میڈیکل کو چیلنج کیا ہے؟

جسٹس سجاد علی شاہ نے ریمارکس دیئے کہ میڈیکل عدالت کے حکم پر ہوا ہے میڈیکل بورڈ بنا تھا۔

جسٹس منیب اختر نے کہا کہ کیا آپ نے عدالت سے استدعا کی ہے کہ بیٹی کو بازیاب کرایا جائے۔

جسٹس منیب اختر نے کہا کہ سندھ ہائیکورٹ نے بازیابی کی درخواست نمٹا دی تھی، انہوں نے استفسار کیا کہ کیا کسی اور عدالت میں ابھی تک کیس زیر سماعت ہے؟

وکیل درخواست گزار نے عدالت کو بتایا کہ ہم نے سیکریٹری صحت کو اس سے متعلق خط لکھا ہے، جسٹس منیب اخترنے کہا کہ آپ جذباتی نہ ہوں قانونی نکات پر عدالت کی معاونت کریں۔

وکیل درخواست گزار نے بتایا کہ پولیس نے اغواء کا کیس سی کلاس کردیا ہے۔

جسٹس محمد علی مظہر نے ریمارکس دیئے کہ فیملی کورٹ میں شادی کو چیلنج کیا جاتا ہے، لڑکی نے ہائیکورٹ اور مجسٹریٹ کے سامنے بیان دیا ہے۔

وکیل درخواست گزار نے بتایا کہ نکاح خواں اور ایک گواہ گرفتار ہیں۔

واضح رہے کہ دعا زہرا کے والد نے سپریم کورٹ کراچی رجسٹری میں گزشتہ روز ایک اور درخواست دائر کی تھی۔

دعا زہرا کے والد نے اپنی درخواست میں مؤقف اختیار کیا تھا کہ دعا نے اپنے انٹرویو میں ملک سے باہر جانے کا ذکر کیا ہے، دعا کو میڈیا پر انٹرویوز اور ملک سے باہر جانے سے روکا جائے، بیٹی کو بازیاب کرا کے عدالت میں پیش کیا جائے۔

کراچی سپریم کورٹ رجسٹری میں دعا زہرا کے والد مہدی…

اس سے قبل 18 جون کو مہدی کاظمی نے سندھ ہائیکورٹ کے فیصلے کے خلاف سپریم کورٹ میں اپیل دائر کی تھی۔

دائر درخواست میں موقف اختیار کیا گیا تھا کہ سندھ ہائیکورٹ کے فیصلے میں خامی ہے، ہائیکورٹ نے 8 جون 2022 کو دعا زہرا کو اسکی مرضی سے فیصلہ کرنے کا حکم دیا تھا۔

ان کا کہنا تھا کہ ہائیکورٹ نے دعا زہرا کے بیان اور میڈیکل ٹیسٹ کی بنیاد پر فیصلہ سنادیا ہے جبکہ میڈیکل رپورٹ میں دعا زہرا کی عمر 17سال بتائی گئی ہے۔

 درخواست گزار نے بتایا کہ نادرا ریکارڈ ،تعلیمی اسناد کے مطابق دعا زہرا کی عمر 14سال ہے ۔

بشکریہ جنگ