حمزہ، رانا ثناء واقعات کے ذمہ دار ہیں، فواد چوہدری

سابق وفاقی وزیر اطلاعات فواد چوہدری کا کہنا ہے کہ واقعات کے ذمے دارحمزہ اور رانا ثنا اللّٰہ ہیں، پنجاب میں رات گئے1100 گھروں پر چھاپے مارے گئے۔

فواد چوہدری نے اپنے ایک بیان میں کہا کہ ریٹائرڈ میجر کے گھر داخل ہونے پر گھر والوں نے ڈاکو سمجھ کر فائر کیا جس سے پولیس اہلکار جان کی بازی ہار گیا۔

انہوں نے کہا کہ کارکنوں کے گھروں پر چھاپے کی مذمت کرتے ہوئے کہا ہے کہ ایکس سروس مین، ریٹائرڈ لوگ بھی پولیس گردی کا نشانہ بنے ہیں۔

پی ٹی آئی سندھ کے صدر اور سابق وفاقی وزیر علی زیدی کا کہنا ہے کہ رات سے پورے پاکستان میں جاری ریاستی دہشتگردی کبھی نہیں دیکھی، پورے سندھ کو ہم اب سری نگر ہائی وے بنائیں گے۔

فواد چوہدری کا مزید کہنا تھا کہ بغیر وارنٹ گھروں میں داخل ہو کر پولیس نے خواتین، بچوں سے بدتمیزی کی، لوگوں کو تشدد کا نشانہ بنایا گیا، 400 سے زائد کارکن حراست میں لیے گئے جن میں خواتین بھی شامل ہیں۔

واضح رہے کہ ملک بھر میں تحریک انصاف کے لانگ مارچ کے اعلان کے بعد پی ٹی آئی کے خلاف کریک ڈاؤن جاری ہے، سابق وفاقی اور صوبائی وزراء سمیت مقامی رہنماؤں کے گھروں پر پولیس کی جانب سے چھاپے مارے جارہے ہیں۔

وفاقی وزیرداخلہ رانا ثناء اللّٰہ کا کہنا ہے کہ بےگناہ پولیس اہلکار کمال احمد کے سینے میں لگی گولی ثبوت ہے کہ عمران خان دہشتگرد ہے، کمال احمد کا قاتل عمران خان، شیخ رشید اور اس کے حواری ہیں۔

لاہور کے علاقے ماڈل ٹاؤن میں پولیس کے چھاپے کے دوران ایک مکان کی چھت سے فائرنگ کے نتیجے میں کانسٹیبل شہید ہوگیا جس کا مقدمہ درج کرلیاگیا۔

دوسری جانب وفاقی وزیرداخلہ رانا ثناء اللّٰہ کا کہنا ہے کہ بےگناہ پولیس اہلکار کمال احمد کے سینے میں لگی گولی ثبوت ہے کہ عمران خان دہشتگرد ہے، کمال احمد کا قاتل عمران خان، شیخ رشید اور اس کے حواری ہیں.

بشکریہ جنگ