ایاز امیر کی بہو کا پوسٹ مارٹم مکمل، قاتل واردات کے وقت نارمل تھا، ذرائع

سینئر صحافی ایاز امیر کے بیٹے شاہنواز کے ہاتھوں قتل ہونے والی اُس کی بیوی سارہ کا پوسٹ مارٹم مکمل کرلیا گیا۔

اسپتال ذرائع کے مطابق پوسٹ مارٹم رپورٹ کے مطابق مقتولہ سارہ کے سر، ماتھے اور بازوؤں پر زخم کے نشانات ہیں۔

بیٹے کے ہاتھوں بہو کے قتل کے واقعے کے حوالے سے سینئر صحافی ایاز امیر نے کہا ہے کہ ایسا واقعہ کسی کے ساتھ پیش نہ آئے، یہ صدمہ کسی کو اٹھانا نہ پڑے۔

اسپتال ذرائع کے مطابق خاتون ڈاکٹر نے سارہ کی لاش کا مکمل معائنہ کیا اور مختلف ایکسرے بھی کیے گئے۔

ذرائع کے مطابق مقتولہ سارہ کی لاش پولیس کلینک کے سرد خانے میں رکھوا دی گئی ہے۔

پولیس حکام کے مطابق مقتولہ کے خاندان سے کینیڈا میں رابطہ کیا جا رہا ہے، مقتولہ کی میت نمونے فارنزک کے لیے بھجوائے جانے کے بعد لواحقین کے حوالے کی جائے گی۔

اسلام آباد کے علاقے چک شہزاد میں سینئر صحافی ایاز امیر کی بہو کو قتل کر دیا گیا۔

ذرائع کے مطابق سارہ کے خاندان سے اگر کوئی بھی مدعی نہ بنا تو پھر پولیس کی مدعیت میں مقدمہ درج ہوگا۔

ذرائع کے مطابق واردات کے وقت قاتل نارمل تھا، وہ کسی نشے کی حالت میں نہیں تھا۔

بشکریہ جنگ