اتواریکم رجب المرجب 1442ھ 14؍ فروری2021ء

انڈیا اسرائیل تعلقات کی سالگرہ: دلی میں اسرائیلی سفارت خانے کے قریب بم دھماکہ

دلی میں اسرائیلی سفارت خانے کے قریب بم دھماکہ، کوئی جانی نقصان نہیں ہوا

انڈیا، دلی، دھماکہ

اسرائیلی سفارتخانہ انتہائی سخت سکیورٹی والے علاقے اے پی جے عبدالکلام روڈ پر واقع ہے۔

ابتدائی خبروں میں بتایا گیا ہے کہ یہ دھماکہ ہلکی نوعیت کا تھا اور اس میں کوئی زخمی نہیں ہوا ہے۔ دھماکے کے بعد پورے علاقے کی ناکہ بندی کر دی گئی ہے، اعلیٰ پولیس اہلکار موقع پر پہنچ گئے ہیں اور دھماکے کی نوعیت کا جائزہ لے رہے ہیں۔

انڈیا، دلی، دھماکہ

دلی پولیس کے ایک ترجمان انل متل نے بی بی سی کو بتایا کہ ’ہم معلومات جمع کر رہے ہیں، ہماری ٹیم موقع پر ہے اور پوری معلومات ملنے کے بعد ہی کچھ کہہ سکتے ہیں۔‘

بی بی سی ہندی سروس نے دلی پولیس کے ترجمان کے حوالے سے بتایا ہے کہ جندال ہاؤس کے قریب اے پی جے عبدالکلام روڈ پر شام پانچ بج کر پانچ منٹ پر ایک کم شدت کا آئی ای ڈی دھماکہ ہوا ہے۔

یہ علاقہ اسرائیلی سفارت خانے کے قریب ہے۔

پولیس کے مطابق اس دھماکے میں صرف قریب کھڑی گاڑیوں کے شیشے ٹوٹے ہیں اور ابتدائی طور پر یہ محسوس ہوتا ہے کہ یہ شرارت سنسنی پھیلانے کے لیے کی گئی ہے۔

یہ دھماکہ ایسے موقع پر ہوا ہے جب اسرائیل اور انڈیا اپنے سفارتی تعلقات کے 29 سال منا رہے ہیں۔

انڈیا، دلی، دھماکہ

اسرائیلی سفارتخانے کے گرد سخت سکیورٹی کا انتظام ہے اور جگہ جگہ سی سی ٹی وی کیمرے نصب ہیں۔ اب دھماکے کے بعد سفارتخانے کی سکیورٹی میں اضافہ کر دیا گیا ہے۔

اسرائیلی میڈیا کی بعض خبروں میں بتایا گیا ہے کہ اسرائیلی حکام صورتحال پر گہری نظر رکھے ہوئے ہیں۔ ٹائمز آف اسرائیل کے مطابق ’اسرائیلی حکام اس دھماکے کو مشتبہ حملے کے طور پر دیکھ رہے ہیں۔‘

روزنامہ یروشلم پوسٹ نے خبر دی ہے کہ ’انڈین سکیورٹی اہلکار اس واقعے کی تفتیش کر رہے ہیں اور اُنھوں نے اسرائیلی حکام سے رابطہ قائم کر رکھا ہے۔‘

اخبار نے اسرائیلی وزارت خارجہ کے ایک بیان کا حوالہ دیتے ہوئے لکھا ہے ’وزیر خارجہ کو اس واقعے کے بارے میں مطلع رکھا جا رہا ہے اور اُنھوں نے سفارتخانے کے اہلکاروں کو ہدایت کی ہے کہ وہ سلامتی کے تمام ضروری اقدامات کریں۔‘

BBCUrdu.com بشکریہ
You might also like

Comments are closed.