اپوزیشن کے ارکان اسمبلی پارلیمنٹ لاجز تک محدود، ذرائع

اپوزیشن کی جانب سے  وزیر اعظم کے خلاف تحریک عدم اعتماد لانے کے بعد حزب اختلاف کے ارکان اسمبلی کو  پارلیمنٹ لاجز تک محدود کردیا گیا۔

ذرائع کا کہنا ہے کہ مسلم لیگ ن کے 9 گروپ قائم کیے گئے، جبکہ ہر گروپ کا ایک کوآرڈینیٹر مقرر کیا گیا ہے۔

 ذرائع کا کہنا ہے کہ ممبران کو پارلیمنٹ لاجز سے باہر جانے کی اجازت نہیں ہے، جب کوئی رکن باہر جاتا ہے تو وہ گروپ لیڈر کو آگاہ کرتا ہے۔

ذرائع کا کہنا ہے کہ پیپلز پارٹی نے تجویز دی ہے کہ پہلے قومی اسمبلی کے انتخابات کا مرحلہ پورا کیا جائے، صوبائی اسمبلیوں کی آئینی مدت پوری ہونے دی جائےْ

ذرائع کا کہنا ہے کہ خواجہ آصف، رانا ثناءاللّٰہ، عبدالرحمان کانجو ،رانا تنویر و دیگر سینئر رہنماؤں کو گروپ لیڈر مقرر کیا گیا ہے۔

ذرائع کا کہنا ہے کہ شاہد خاقان عباسی، احسن اقبال ارکان اسمبلی سے مسلسل رابطے میں ہیں، خواجہ آصف، مرتضیٰ جاوید عباسی بھی ارکان اسمبلی سے مسلسل رابطے  میں ہیں۔

تحریک عدم اعتماد: 14 مارچ کو اجلاس بلانے کی تجویز

واضح رہے کہ حکومت کے خلاف اپوزیشن کی جانب سے جمع کروائی گئی تحریک عدم اعتماد پر بحث اور ووٹنگ کے معاملے پر قومی اسمبلی سیکرٹریٹ نے اسپیکر کو 14 مارچ کو اجلاس بُلانے کی تجویز دی ہے۔

ذرائع کے مطابق تجویز دی گئی ہے کہ 3 دن بحث کے بعد 18 مارچ کو ووٹنگ کروادی جائے، قومی اسمبلی سیکرٹریٹ کی تجویز پر حتمی فیصلہ اسپیکر اسد قیصر کریں گے۔

قواعد کے مطابق ریکوزیشن پر اسمبلی اجلاس 14 دن میں بُلانا ہوتا ہے۔

یاد رہے کہ گزشتہ دنوں اپوزیشن نے وزیراعظم عمران خان کے خلاف تحریک عدم اعتماد اسمبلی سیکریٹریٹ میں جمع کروائی تھی۔

بشکریہ جنگ