شرح سود پونے 10 فیصد پر برقرار، اسٹیٹ بینک

اسٹیٹ بینک آف پاکستان (ایس بی پی) نے شرح سود کو پونے دس فیصد پر برقرار رکھا ہے۔ روس یوکرین تنازعہ سے اجناس کی قیمتوں میں بے یقینی کی صورتحال ہے۔ کرنٹ اکاؤنٹ خسارہ اور مہنگائی بڑھی تو شرح سود بدلنا پڑسکتا ہے۔ ضرورت ہوئی تو مانیٹری پالیسی کمیٹی اپریل کے شیڈول اجلاس سے پہلے بھی مل سکتی ہے۔

اسٹیٹ بینک کی مانیٹری پالیسی کمیٹی کے پالیسی بیان کے مطابق کمیٹی کے سابقہ فیصلوں کے سبب معاشی نمو معتدل اور پائیدار ہوئی ہے، جنوری اور فروری میں تجارتی خسارے میں کمی مقامی طلب میں ٹھہراؤ کا اشارہ دے رہی ہے۔

کمیٹی کے مطابق مہنگائی کی شرح جنوری کے 13 فیصد سے کم ہوکر فروری میں 12 اعشاریہ 2 فیصد رہی۔

کمیٹی نے رواں مالی سال مہنگائی میں اضافے کی شرح 9 سے 11 فیصد رہنے کا اندازہ برقرار رکھا ہے۔

مرکزی بینک کے مطابق حقیقی سود کی شرح مہنگائی کو درمیانی مدت کے ہدف پانچ سے سات فیصد تک لانے کے لیے موزوں ہے، البتہ روس یوکرین تنازعے نے عالمی اجناس کی قیمتوں کی بے یقینی کو بڑھایا ہے۔

اس کا کہنا ہے کہ صورتحال کرنٹ اکاؤنٹ خسارے اور مہنگائی کا منظر نامہ خراب کرسکتی ہے، یہ صورتحال رہی تو شرح سود کو بدلنے کی ضرورت پڑسکتی ہے۔ اس لیے مانیٹری پالیسی کمیٹی اپریل کے شیڈول اجلاس سے پہلے پالیسی ریٹ بدلنے کے لیے ملاقات کرسکتی ہے۔

بشکریہ جنگ