ترین گروپ کے رہنما جہانگیر ترین سے مشاورت کیلئے لندن جائینگے

ترین گروپ کے رہنماؤں نے موجودہ سیاسی صورتِ حال پر اپنے سربراہ جہانگیر ترین سے مشاورت کے لیے لندن جانے کا فیصلہ کر لیا۔

ذرائع نے بتایا ہے کہ ترین گروپ کے اہم رہنما آئندہ 2 روز میں جہانگیر ترین سے ملاقات کے لیے لندن روانہ ہو جائیں گے۔

ذرائع کے مطابق ترین گروپ کے رہنما اسحٰق خاکوانی اور عون چوہدری لندن جائیں گے جہاں وہ موجودہ سیاسی صورتِ حال پر جہانگیر ترین سے مشاورت کریں گے۔

ترین گروپ سے تعلق رکھنے والے عون چوہدری کا کہنا ہے کہ پی ٹی آئی رہنما عبدالعلیم خان بھی جہانگیر ترین سے ملاقات کے لیے لندن جا رہے ہیں۔

وفاقی وزیرِ اطلاعات و نشریات فوادچوہدری کا کہنا ہے کہ جہانگیر ترین کی صحت بہتر ہے، وہ اسپتال سے گھر شفٹ ہو گئے ہیں، ابھی پاکستان نہیں آ رہے، لندن میں ہی رہیں گے۔

انہوں نے بتایا کہ جہانگیر ترین کے آئندہ طبی معائنے کے بعد عبدالعلیم خان ان سے ملاقات کریں گے، دونوں رہنماؤں کی ملاقات کے شیڈول کو جلد حتمی شکل دی جائے گی۔

عون چوہدری نے مزید بتایا کہ ملاقات میں خاکوانی اور ترین گروپ کے دیگر ارکانِ اسمبلی کی شرکت بھی متوقع ہے۔

ترین گروپ کے رہنما کا یہ بھی کہنا ہے کہ ملاقات میں عبدالعلیم خان اور جہانگیر ترین مشترکہ حکمتِ عملی کو حتمی شکل دیں گے۔

بشکریہ جنگ