پشاور دھماکا، خودکش بمبار کی ساتھیوں کے ہمراہ ویڈیو سامنے آ گئی

پشاور کی جامع مسجد کوچہ رسالدار پر نمازِ جمعہ کے دوران خود کش حملہ کرنے والے بمبار کی دھماکے سے قبل اپنے ساتھی دہشت گردوں کے ساتھ گفتگو کرتے ویڈیو سامنے آگئی۔

دھماکے سے کچھ دیر قبل کی ایک اور ویڈیو منظرِ عام پر آئی ہے جس میں تینوں دہشت گردوں کو گفتگو کرتے دیکھا جا سکتا ہے۔

گفتگو کے بعد تینوں دہشت گرد کوہاٹی چوک کی جانب روانہ ہو جاتے ہیں۔

اس سے قبل گزشتہ روز پشاور دھماکے کی منظرِعام پر آنے والی ویڈیو میں خود کش حملہ آور کو ساتھیوں سمیت رکشے میں آتے دیکھا گیا تھا۔

پشاور کی جامع مسجد کوچہ رسالدار پر خودکش حملہ کرنے والے خودکش بمبار کے جسمانی اعضا اور فنگرپرنٹ سے دہشت گرد کی شناخت ہوگئی ہے۔

واضح رہے کہ جمعے کے روز خیبر پختون خوا کے دارالخلافہ پشاور کے علاقے قصہ خوانی بازار کی جامع مسجد کوچہ رسالدار میں نمازِ جمعہ کے دوران ہوئے خود کش حملے میں شہید ہونے والے افراد کی تعداد 63 ہو چکی ہے۔

واقعے میں 200 سے زائد افراد زخمی ہوئے تھے جن میں سے 37 زخمی لیڈی ریڈنگ اسپتال میں زیرِ علاج ہیں، جبکہ 5 زخمی آئی سی یو میں ہیں۔

عینی شاہدین کے مطابق جامع مسجد میں نمازِ جمعہ کے دوران سیاہ لباس میں ملبوس خودکش بمبار نے پہلے سیکیورٹی اہلکاروں پر فائرنگ کی پھر منبر کے سامنے آ کر خود کو دھماکے سے اڑا لیا تھا۔

اس حوالے سے سی سی پی او پشاور کا کہنا ہے کہ دہشت گردوں کے کچھ سہولت کاروں کو حراست میں لے لیا ہے اور خودکش حملہ آور کی شناخت بھی ہو گئی ہے۔

بشکریہ جنگ