کراچی، ملزمان کی پولیس پر فائرنگ، اہلکار سمیت 3 افراد زخمی

کراچی کے علاقے فیڈرل بی ایریا میں پولیس پر فائرنگ کے واقعے میں ایک اہلکار سمیت 3 افراد زخمی ہوگئے۔

سینئر سپرنٹنڈنٹ پولیس سینٹرل معروف عثمان کے مطابق فیڈرل بی انڈسٹریل ایریا تھانے کے پولیس اہلکار موبائل میں فیڈرل بی ایریا بلاک 22 میں گشت پر تھے کہ موٹر سائیکلوں پر سوار 4 مشکوک ملزمان کو اہلکاروں نے رکنے کا اشارہ کیا۔

ملزمان نے رکنے کی بجائے پولیس پر فائرنگ کردی جس کے جواب میں پولیس اہلکاروں نے بھی فائرنگ کی تاہم فائرنگ کے تبادلے کے دوران ملزمان فرار ہوگئے۔

پولیس کے مطابق فائرنگ سے ایک پولیس اہلکار اور 2 راہگیر زخمی ہوئے ہیں۔

معروف عثمان کے مطابق زخمی پولیس اہلکار کی حالت خطرے سے باہر ہے جسے کراچی کے نجی اسپتال میں طبی امداد دی جا رہی ہےجبکہ واقعے کے دیگر 2 زخمیوں کو فوری طور پر عباسی شہید اسپتال منتقل کر دیا گیا ہے۔

بشکریہ جنگ