آج کا دن کئی حوالوں سے یادگار ہے: فواد چوہدری

وفاقی وزیراطلاعات فواد چوہدری نے کہا ہے کہ آج کا دن کئی حوالوں سے یادگار ہے، آج 24 سال بعد آسٹریلیا کی کرکٹ ٹیم پاکستان آئی ہے، آج پاکستان میں انٹرنیشنل کرکٹ کی مکمل بحالی کا دن ہے۔

اپنے ویڈیو بیان میں فواد چوہدری نے کہا کہ آج پی ایس ایل کا فائنل ہے، طویل مدت کے بعد مکمل پی ایس ایل پاکستان منتقل ہوا، یہ سب ہماری حکومت کے دوران ہوا۔

فواد چوہدری نے کہا کہ آج آپریشن سوئفٹ ریٹورٹ کی یاد کا دن ہے، ہمارے شاہینوں نے بتا دیا کہ پاکستان پر بری نگاہ ڈالنے کا کیا انجام ہوتا ہے۔

اُنہوں نے کہا کہ وزیراعظم عمران خان کی قیادت میں ہماری افواج نے بہترین جواب دیا، بھارت کو یہ جواب مدتوں یاد رہے گا۔

وفاقی وزیر نے کہا کہ آج کا تاریخی دن ہمارے لیے باعث فخر ہے، تین سال پہلے آپریشن سوئفٹ ریٹورٹ کا تاریخی معرکہ ہوا اور میں خوش قسمت ہوں اس تمام فیصلہ سازی کےمرحلے کا حصہ رہا۔

فواد چوہدری نے مزید کہا کہ ہمارےجانبازوں نے جس طرح پاکستانیوں کا سر فخر سے اونچا کیا وہ تاریخ کا حصہ ہے۔

بشکریہ جنگ