پشاور: موٹر وے ایم ون حفاظتی باڑ کاٹنےکی تین وارداتیں، ملزمان گرفتار

نیشنل ہائی ویز اینڈ موٹروے پولیس نے پشاور ٹول پلازہ اور چارسدہ انٹرچینج کے درمیان موٹروے کی حفاظتی باڑ کاٹنے کی تین مختلف وارداتوں میں ملوث ملزمان کو گرفتار کرلیا ہے۔ 

موٹروے پولیس کے ترجمان کے مطابق تین مختلف وارداتوں میں جب پٹرولنگ افسران اپنی گاڑی میں گشت پر تھے تو انہوں نے نیچے ورج میں موجود ملزمان کو پکڑ کر حراست میں لیا۔ 

چارسدہ انٹرچینج کے پاس ملزم رات کی تاریکی کا فائدہ اٹھاتے ہوئے حفاظتی باڑ کاٹ کر چنگ چی رکشہ میں لوڈ کر رہا تھا۔ موٹروے پولیس کو دیکھ کر ملزم کھیتوں میں بھاگنے لگا، جس کو موٹروے پولیس کے اہلکاروں نے تعاقب کرکے پکڑ لیا۔

دوسرے واقعے میں چارسدہ انٹرچینج کے پاس ہی موجود ایک شخص درختوں کی آڑ کا فائدہ اٹھا کر حفاظتی باڑ کاٹ رہا تھا کہ رنگے ہاتھوں گرفتار کرلیا گیا۔

دونوں واقعات میں ملوث افراد کو قانونی کارروائی کے بعد تھانہ پڑانگ چارسدہ کے حوالے کیا گیا۔

اسی طرح کے ایک اور واقعے میں پشاور ٹول پلازہ کے قریب ملزمان واردات کے بعد لپیٹی ہوئی حفاظتی باڑ اٹھا کر لے جا رہے تھے، جنہیں موٹروے پولیس نے سروس روڈ پر پکڑ لیا اور قانونی کارروائی کے بعد تھانہ چمکنی پولیس پشاور کے حوالے کیا۔

موٹروے پر حفاظتی باڑ کی چوری موٹر وے پولیس کے لیے ایک چیلنج بن چکی ہے۔ باڑ کے نا ہونے سے موٹروے پر سفر غیر محفوظ بن جاتا ہے جس کے تدارک کیلئے موٹروے پولیس موثر انداز میں کارروائی کررہی ہے۔

بشکریہ جنگ