قاسم اکرم نے اپنی جدوجہد کے بارے میں بتادیا

پاکستان سپر لیگ (پی ایس ایل) کے ساتویں ایڈیشن میں کراچی کنگز کی نمائندگی کرنے والے قاسم اکرم نے کرکٹ کے میدان میں جگہ بنانے سے متعلق اپنی جدوجہد کے بارے میں بتادیا۔

قاسم اکرم کا کہنا ہے کہ مجھے بچپن سے ہی کرکٹ کھیلنے کا بہت شوق تھا  جب میرے بڑے بھائی کھیلتے تھے تو انہیں دیکھ کر مجھے بھی کرکٹ کھیلنے کا بہت شوق ہوا.

ان کا کہنا تھا کہ روز کرکٹ اکیڈمی کے باہر جاکر کھڑا ہونے کے بعد کھلاڑیوں کو دیکھ کر ان جیسا بننے کی خواہش کرتا تھا، ایک دن اکیڈمی کے کوچ نے مجھے بھی کھیلنے کا موقع دیا تو پھر میں روز کھیلنے لگا۔

انہوں نے کہا کہ اس مقام تک پہنچنے کے لیے میں نے بہت محنت کی ہے میں روز صبح فجر میں اٹھنے کے بعد ٹریننگ کے لیے جاتا تھا اور اپنی صلاحیتوں کو بڑھانے کی کوشش کرتا تھا، جہاں مجھے موقع ملا میں نے اپنی صلاحیتں دکھانے کی پوری کوشش کی۔

قاسم اکرم نے کہا کہ پی ایس ایل کھیلتے ہوئے مجھے بہت اچھا لگ رہا ہے اور بین الاقوامی کھلاڑیوں سے بہت کچھ سیکھنے کی کوشش کر رہا ہوں، میرا مقصد پاکستانی ٹیم میں جا کر اچھا پرفارم کرنے کا ہے۔

انہوں نے کہا کہ مجھے فخر ہے کہ پاکستان انڈر 19 سے کھیلتے ہوئے میں نے اپنی ٹیم کے لیے سنچری اسکور کی اور 5 وکٹیں بھی حاصل کیں۔

قاسم اکرم نے کہا کہ شعیب ملک اور محمد حفیظ ان کے آئیڈیل کھلاڑیوں میں سے  ہیں۔

بشکریہ جنگ