کالا باغ ڈیم کی تعمیر پر وفاق سے بات نہیں ہوسکتی، اسماعیل راہو

وزیر ماحولیات و جامعات اسماعیل راہو نے کہا ہے کہ کالا باغ ڈیم کی تعمیر پر بھی وفاق سے کوئی بات چیت نہیں ہوسکتی، سندھ، کے پی اور بلوچستان کی صوبائی اسمبلیاں کالا باغ ڈیم کو مسترد کر چکی ہیں۔

اسماعیل راہو نے اپنے ایک بیان میں کہا ہے کہ عمران خان جان بوجھ کے چھوٹے صوبوں کے زخموں پر نمک پاشی کر رہے ہیں، پہلے ہی نیازی سرکار سندھ کے پانی پر ڈاکے ڈال رہی ہے۔

انہوں نے کہاکہ پنجاب حکومت گریٹر تھل کینال 2 منصوبہ تعمیر کر رہی ہے جو آبی معاہدےکی خلاف ورزی ہےاور یہ بحران جن صوبوں کو شدید متاثر کریگا سندھ ان میں سر فہرست ہے۔

صوبائی وزیر کا مزید کہنا تھا کہ پانی کی قلت کی وجہ سے سندھ کے ساحلی اضلاع بدین، سجاول اور ٹھٹھہ شدید متاثر ہو رہے ہیں، یہ نئے منصوبے سندھ کی تباہی کا سبب بنیں گے، پنجاب اور وفاقی حکومت اپنے فیصلوں پر نظر ثانی کریں۔

بشکریہ جنگ