ویوین رچرڈز نے مجھے اعتماد دیا، عمر اکمل
ایچ بی ایل پاکستان سپر لیگ ( پی ایس ایل) کی ٹیم کوئٹہ گلیڈی ایٹرز کے کرکٹر عمر اکمل کا کہنا ہے کہ کوئٹہ گلیڈی ایٹرز کی ٹیم مینجمنٹ کا شکر گزار ہوں جنہوں نے مجھ پر اعتماد کیا، مجھے پی ایس ایل میں موقع دیا اور مجھے عزت ملی ہے۔
عمر اکمل نے کہا کہ سر ویوین رچرڈز نے مجھے اعتماد دیا اور کہا کہ خود پر یقین رکھنا ہے، شاہد آفریدی نے ہمیشہ کی طرح حوصلہ بڑھایا اور عمر گل نے کہا کہ تم نے پاکستان کو ایسی صورتحال میں کئی میچز جتوائے ہیں، اسی یقین سے کھیلو۔
انہوں نے مزید کہا کہ میں نے خود پر یقین رکھا، میری اننگز ٹیم کے کام آئی، مینجمنٹ نے جو رول دیا اس کے مطابق کھیلنے کی کوشش کی۔
ان کا یہ کہنا تھا کہ پی ایس ایل میں کوئٹہ گلیڈی ایٹرز کا ردھم اچھا بنا ہوا ہے، ٹاپ آرڈر میں جیسن رائے اور احسان اننگز بنا دیتے ہیں اور پھر اس کے بعد تیسرے اور چوتھے نمبر پر آنے والے بیٹسمین اس کو آ گے بڑھاتے ہیں۔
گزشتہ روز عمر اکمل نے پی ایس ایل 7 میں کوئٹہ گلیڈی ایٹرز کی جانب سے اسلام آباد یونائیٹڈ کے خلاف پہلا میچ کھیلا تھا، وہ دو برس کے بعد ایکشن میں دکھائی دیئے تھے، ان کی اننگز سنسنی خیز میچ میں کوئٹہ گلیڈی ایٹرز کی کامیابی کے لئے بڑی معاون ثابت ہوئی، انہوں نے 8 گیندوں پر تین چھکوں کی مدد سے 23 رنز بنائے تھے۔
خیال رہے کہ گزشتہ روز کھیلے گئے میچ میں کوئٹہ گلیڈی ایٹرز نے اسلام آباد یونائیٹڈ کو 5 وکٹ سے شکست دی تھی۔
Comments are closed.