ایشیز میں ناکامی،انگلینڈ کے ہیڈ کوچ عہدے سے فارغ

آسٹریلیا کیخلاف ایشیز سیریز میں انگلینڈ کی مایوس کن کارکردگی کے بعد کرس سلور ووڈ کو انگلش ٹیم کے ہیڈ کوچ کے عہدے سے فارغ کردیا گیا ہے۔

انگلینڈ کو ایشیز سیریز میں آسٹریلیا نے چار ۔ صفر سے شکست دی تھی جس کے بعد ای سی بی نے انگلش کوچنگ سیٹ اپ میں تبدیلی کا عندیہ پہلے ہی دے دیا تھا ، تبدیلی کی اس لہر کا پہلا شکار ٹیم کے ایم ڈی ایشلے جائلز تھے جنہیں ایک روز قبل عہدے سے ہٹایا گیا تھا ۔

جائلز کی برطرفی کے 24 گھنٹے بعد ہیڈ کوچ کرس سلور ووڈ کو بھی فارغ کردیا گیا۔

ای سی بی کے مطابق ویسٹ انڈیز کیخلاف سیریز کیلئے عبوری کوچنگ اسٹاف کا تقرر کیا جائے گا جس کا اعلان قائم مقام ٹیم مینجمنٹ ڈائریکٹر اینڈریو اسٹراس کریں گے۔

قائم مقام کوچ کیلئے رچرڈ ڈاؤسن کا نام فیورٹ قرار دیا جارہا ہے جو اس وقت ویسٹ انڈیز میں انگلینڈ کی انڈر 19 ٹیم کے ساتھ موجود ہیں۔

کرس سلور ووڈ کو 2019 ء میں ٹریور بیلس کی سبکدوشی کے بعد انگلش ٹیم کا ہیڈ کوچ مقرر کیا گیا تھا۔

ای سی بی کے چیف ایگزیکٹو ٹاہم ہیریسن کا کہنا ہے کہ کرس سلور ووڈ کی کوچنگ میں انگلینڈ کی وائٹ بال ٹیم نے شاندار کارکردگی دکھائی، ای سی بی ان کی خدمات پر ان کا شکرگزار ہے۔

بشکریہ جنگ