آسٹریلیا سیریز کے میچز ایک ہی وینیو پر نہیں ہونگے، پی سی بی

پاکستان کرکٹ بورڈ کا کہنا ہے کہ آسٹریلیا کے خلاف سیریز کے میچز ایک وینیو پر کروانے کی تجویز زیر غور نہیں ہے۔

پی سی بی نے واضح کیا ہے کہ آسٹریلیا کے خلاف ٹیسٹ میچز کراچی راولپنڈی اور لاہور میں ہی ہوں گے ، ان تینوں وینیوز پر محفوظ اور سیکیور ماحول کے انتظامات کر رہے ہیں۔

کرکٹ بورڈ کا مزید کہنا ہے کہ انٹرنیشنل کرکٹ کے 19 روز کا ایک وینیو پر انتظام کرنا ممکن نہیں ہے۔

آسٹریلیا کرکٹ ٹیم دورۂ پاکستان میں تینوں ٹیسٹ میچ ایک ہی وینیو پر کھیلنے کا خواہشمند ہے، اس سلسلے میں کرکٹ آسٹریلیا کی پی سی بی سے بات چیت جاری ہے۔

پی سی بی نے کہاکہ سیریز کے قریب این سی او سی کراؤڈ کے حوالے سے فیصلہ کرے گی۔

واضح رہے کہ پاکستان اور آسٹریلیا کے درمیان تین ٹیسٹ کی سیریز کا پہلا میچ 3 مارچ سے کراچی میں شروع ہو گا، دوسرا ٹیسٹ راولپنڈی اور تیسرا لاہور میں شیڈولڈ ہے، جس کے بعد تین ون ڈے اور واحد ٹی ٹوئنٹی میچ لاہور میں منعقد ہونگے ۔

یہ آسٹریلیا کا 1998کے بعد پہلا دورۂ پاکستان ہے۔

بشکریہ جنگ