سانحہ مری کا سسٹم اور حکومتی نظام بھی ذمے دار ہے، صداقت علی عباسی

حکومتی جماعت پاکستان تحریک انصاف کے ممبر قومی اسمبلی صداقت علی عباسی کا کہنا ہے کہ مری میں ہر بار سڑکیں بند ہوتی ہیں اور صفائی بھی ہوتی ہے، سسٹم اور حکومتی نظام بھی ذمے دار ہے۔

سماجی رابطے کی ویب سائٹ ٹوئٹر پر اپنے بیان میں پی ٹی آئی رہنما صداقت علی عباسی نے کہا کہ مری میں موسم کی شدت تھی، برفانی طوفان آیا تھا، گزشتہ 25 سال میں ایسی برفباری کی مثال نہیں ملتی۔

صداقت علی عباسی کاکہنا تھا کہ برفانی طوفان کےباعث ہیوی مشین اس مقام تک نہ پہنچ سکی، مری سے نتھیا گلی جانی والی ٹریفک بھی واپس آرہی تھی۔

ان کاکہنا تھا کہ بہت تھوڑےوقت میں برف کا لیول بڑھ گیا۔

مری میں برفانی طوفان کے تین روز بعد بھی زندگی معمول پر نہیں آسکی ، دھوپ تو نکل آئی مگر موسم بدستور سرد ہے، پانی، بجلی کی فراہمی مکمل طور پر بحال نہ ہوسکی، موبائل فون سروس بھی متاثر ہے، مری میں پھنسے سیاحوں کی بڑی تعداد واپس چلی گئی ہے۔

پی ٹی آئی رہنما کاکہنا تھا کہ جہاں کاروباری لوگوں کی ناجائز منافع خوری کی شکایات ہیں وہاں پرمقامی لوگوں کی زندگیاں بچانے اور مہمان نوازی کی لاتعداد مثالوں کو نہ سراہنا سراسر ناانصافی ہے۔

بشکریہ جنگ