کراچی میں کل سے بارشوں کے آغاز کا امکان

محکمۂ موسمیات کی جانب سے بلوچستان کے بعض شمالی اضلاع میں برفباری کی پیشگوئی کی گئی ہے، کراچی میں 3 جنوری تک سرد ہوائیں چلتی رہیں گی، شہر میں 5 اور 6 جنوری کو موسم سرما کی دوسری بارش کا امکان ہے۔

ڈائریکٹر محکمہ موسمیات کے مطابق شہرِ قائد میں گرج چمک کے ساتھ درمیانی اور کہیں تیز بارش کا امکان ہے، 4 جنوری سے شہر میں سسٹم کے تحت بوندا باندی بھی ہوسکتی ہے۔

محکمۂ موسمیات نے ملک کے سب سے بڑے شہر کراچی میں منگل 4 جنوری سے بارش کی نوید سنا دی، کہا ہے کہ سندھ کے بڑے اضلاع کراچی اور حیدر آباد میں 4 سے 7 جنوری تک بارش کا امکان ہے۔

محکمہ موسمیات نے بتایا ہے کہ نیا مغربی سلسلہ موسم سرما کے سابقہ سسٹم سے زیادہ طاقتور ہے، حیدرآباد، سکھر، لاڑکانہ، قمبر شہداد کوٹ میں گرج چمک کے ساتھ بارش کا امکان ہےجبکہ بدین، ٹھٹھ، ٹنڈوالہ یار، عمرکوٹ، تھرپارکر سمیت صوبے کے دیگر علاقوں میں تیز بارش کا امکان ہے۔

ڈائریکٹر محکمہ موسمیات سردار سرفراز کا کہنا ہے کہ بارش اور ہواؤں کا سسٹم بلوچستان کے اضلاع پر زیادہ اثر انداز ہوگا، سسٹم ملک کے شمالی علاقوں میں بھی بارش کا باعث بن سکتا ہے۔

بشکریہ جنگ