ملک میں کتنے افراد کو کورونا ویکسین لگائی جاچکی ہے؟

وفاقی وزیر اور سربراہ این سی او سی اسد عمر نے کہا ہے کہ ملک بھر میں انسداد کورونا ویکسین کی 15 کروڑ سے زائد خوراکیں لگائی جاچکی ہیں۔

وفاقی وزیر اسد عمر نے ایک بیان میں کہا کہ صوبوں میں ویکسین لگانے کے اعتبار سے پنجاب سب سے آگے ہے، پنجاب میں 68 فیصد افراد کو ویکسین کی کم از کم ایک خوراک لگ چکی ہے۔

انہوں نے مزید کہا کہ کے پی میں ویکسین کی اہل57 فیصد آبادی کو ویکسین کی ایک خوراک لگ چکی ہے جبکہ سندھ میں 51 فیصد ویکسین کی اہل آبادی کو کم ازکم ایک خوراک لگ چکی ہے۔

پاکستان میں کورونا وائرس کی چوتھی لہر کی شدت کم ہو رہی ہے، اس کے کیسز کے بعد اب اموات میں بھی کمی آ رہی ہے، ملک کورونا مریضوں کے حوالے سے مرتب کی گئی فہرست میں 34 ویں نمبر پر ہے۔

ان کا یہ بھی کہنا تھا کہ بلوچستان میں ویکسین کی 38 فیصد اہل آبادی کو کم ازکم ایک خوراک لگ چکی ہے اور دسمبر میں ویکسین لگنے کی رفتار میں تیزی سے اضافہ ہوا ہے۔

بشکریہ جنگ