وزیر اعظم نے پی ٹی آئی کے تمام تنظیمی ڈھانچے کو تحلیل کر دیا

وزیر اعظم عمران خان  نے پی ٹی آئی کے تمام تنظیمی ڈھانچے کو تحلیل کر دیا، جس کے بعد نئی آئینی کمیٹی تشکیل دے  دی گئی ہے۔

وزیراطلاعات فواد چوہدری  نے اسلام آباد میں پریس کانفرنس  کرتے ہوئے کہا کہ اب  کسی رشتہ دار کو ٹکٹ دینے کا فیصلہ مقامی قیادت نہیں کرے گی، وفاقی سطح پر فیصلے ہوں گے، پارٹی کا نیا انتظامی ڈھانچہ تشکیل دیا جائے گا۔

فواد چوہدری نے کہا کہ کسی کو لیڈر مانا جاتا ہے تو وہ عمران خان ہیں، تحریک انصاف کے سوا کوئی ایسی پارٹی نہیں جو اتنی بڑی تعداد میں ٹکٹ جاری کرے، تحریک انصاف ملک کی سب سے بڑی جماعت ہے، تحریک انصاف نیچے جاتی ہے تو پاکستان کی سیاست نیچے جائے گی۔

ذرائع کا کہنا ہے کہ عمران خان نے کہا کہ نواز شریف کی سزا ختم ہونے سے متعلق قیاس آرائیاں ہو رہی ہیں، یہ کیسے ممکن ہے سزا یافتہ شخص کی سزا ختم ہو جائے۔

وزیر اطلاعات نے کہا کہ وزیراعظم نے کے پی الیکشن میں وزیراعلیٰ محمود خان، پرویز خٹک سے بات چیت کی، وزیراعظم نے تحریک انصاف کے پی کی کارکردگی پر عدم اعتماد کا اظہار کیا۔

 فواد چوہدری نے کہا کہ ویلیج کونسل کے انتخابات کے نتائج کے مطابق تحریک انصاف اب بھی بڑی جماعت ہے، پی ٹی آئی چاروں صوبوں میں ہے، پیپلز پارٹی صرف اندرون سندھ کی جماعت ہے، ن لیگ صرف پنجاب تک محدود ہے۔

انہوں نے کہا کہ پی ٹی آئی کو فارگرانٹڈ نہیں لیا جاسکتا، انتخابات میں 1100 سے زائد ٹکٹ دیے جاتے ہیں، پی ٹی آئی کے علاوہ کسی جماعت کی حیثیت ہی نہیں کہ اتنے لوگ انتخابات میں کھڑے کرسکے۔

بشکریہ جنگ