قانون ہاتھ میں لینا شرعی اور قانونی طور پر غلط ہے، ڈاکٹر قبلہ ایاز

چیئرمین اسلامی نظریاتی کونسل ڈاکٹر قبلہ ایاز نے کہا ہے کہ قانون ہاتھ میں لینا شرعی اور قانونی طور پر غلط ہے۔

اسلام آباد میں وزیراعظم عمران خان کے نمائندہ خصوصی برائے مذہبی ہم آہنگی طاہر اشرفی کے ہمراہ قبلہ ایاز نے پریس کانفرنس کی۔

اسلامی نظریاتی کونسل کے اجلاس میں سفارش کی گئی کہ قانون ہاتھ میں لینے والے سے ریاست کو قوت سے نمٹنا چاہیے۔

سفارشات میں مزید کہا گیا کہ اس حوالے سے قانون سازی کی ضرورت ہو تو وہ بھی کی جائے، ناجائز، پرتشدد کارروائیاں روکنے کے لیے عوامی شعور بیداری مہم چلائی جائے۔

ڈاکٹر قبلہ ایاز نے کہا کہ نے کہا کہ اسلامی نظریاتی کونسل کے اجلاس میں سانحہ سیالکوٹ کے ملزمان کو قرار واقعی سزا دینے کا مطالبہ کیا ہے۔

چیئرمین نظریاتی کونسل نے مزید کہاکہ اجلاس نے حکومت کی جانب سے معاملے کو بہترین انداز سے ہینڈل کرنے پر اطمینان کا اظہار کیا ہے۔

اُن کا کہنا تھا کہ اجلاس نے معاملہ سلجھانے کی کوشش کرنے والے ملک عدنان کو ایوارڈ دینے کے فیصلے کو سراہا۔

ڈاکٹر قبلہ ایاز نے یہ بھی کہا کہ اسلامی نظریاتی کونسل سوشل میڈیا پر تشدد پر اکسانے والا مواد ہٹانے کی سفارش کرتی ہے۔

انہوں نے کہا کہ قانون کو ہاتھ میں لینا شرعی اور قانونی طور پر غلط ہے، معاملہ بہتر انداز میں ہینڈل کرنے سے پاکستان کا اصل چہرہ سری لنکا اور دنیا کے سامنے آسکا۔

چیئرمین نظریاتی کونسل کا کہنا تھا کہ کوشش ہے کہ لوگوں کو سمجھایا جائے کہ وہ قانون ہاتھ میں نہیں لے سکتے، پاکستان میں سزاؤں کا مسئلہ نہیں، قوانین پر عملدرآمد مسئلہ ہے۔

انہوں نے کہا کہ اسلامی نظریاتی کونسل کے ارکان اظہار یکجہتی کیلئے سری لنکن سفارتخانہ گئے، سری لنکا میں مسلمانوں کے لئے خطرہ پیدا ہوگیا تھا، قوم کے ردعمل سے وہ خطرہ ٹل گیا۔

ڈاکٹر قبلہ ایاز نے مزید کہا کہ اسلامی نظریاتی کونسل سانحہ سیالکوٹ جیسے واقعات کو سنجیدہ لے رہی ہے، اس طرح کے واقعات روکنے کیلئے جلد مزید سفارشات دینے کی کوشش کی جائے گی۔

بشکریہ جنگ