پاکستان میں مکمل طور پر انٹرنیشنل کرکٹ واپس آگئی ہے، فیصل جاوید خان

پاکستان تحریک انصاف (پی ٹی آئی) کے رہنما فیصل جاوید خان کا نیوزی لینڈ کرکٹ ٹیم کے دو مرتبہ پاکستان آنے کے اعلان پر کہنا ہےکہ پاکستان میں مکمل طور پر انٹرنیشنل کرکٹ واپس آگئی ہے۔

انہوں نے سوشل میڈیا پر جاری  بیان میں کہا کہ نیوزی لینڈ 2 ٹیسٹ،8 ون ڈے، 5 ٹی20 کیلئے 2022 اور 2023 میں2 بار پاکستان کا دورہ کرے گا۔

سینیٹر فیصل جاوید خان  نے کہا کہ نیوزی لینڈ کرکٹ ٹیم کی پاکستان آمد کا سن کر بہت اچھا لگا، نیوزی لینڈ کرکٹ ٹیم کو پاکستان میں خوش آمدید کہتے ہیں۔

چیئرمین پاکستان کرکٹ بورڈ رمیز راجا کی نیوزی لینڈ کرکٹ کے چیئرمین مارٹن سینیڈن سے ملاقاتوں میں تبادلہ خیال کے بعد ان دوروں کو حتمی شکل دی گئی ہے۔

انہوں نے کہا کہ پاکستان میں مکمل طور پر انٹرنیشنل کرکٹ واپس آگئی ہے ،  آسٹریلیا کرکٹ ٹیم بھی 1998 ء کے بعد سے پاکستان کا دورہ کر رہی ہے۔

انہوں نے کہا کہ حالیہ برسوں میں ایم سی سی، پی ایس ایل کی میزبانی بھی کی، پاکستان دنیا کی توجہ کا مرکز بن گیا ہے، پاکستان نے41سال کے وقفے کے بعد یو این عالمی ماحولیاتی کانفرنس، او آئی سی کے غیرمعمولی اجلاس کی میزبانی کی۔

فیصل جاوید خان نے کہا کہ پاکستان میں 2019 میں ملکی سیاحوں کی آمد دگنی ہوگئی، دنیا کورونا مینجمنٹ، کلائمیٹ چینج، افغان انخلاء ، آئی ٹی بوم پر ہماری کوششوں کا اعتراف کر رہی ہے۔

بشکریہ جنگ