پی سی بی نے کوچز کی تلاش کا اشتہار دیدیا

پاکستان کرکٹ بورڈ (پی سی بی) نے کوچز کی تلاش کیلئے اشتہار جاری کرکے اہل امیدواروں سے درخواستیں طلب کر لی ہیں، پہلی بار پاور ہٹنگ کوچ کی بھی خدمات حاصل کی جائیں گی۔

پی سی بی کی جانب سے جاری کیے گئے اشتہار کے مطابق ہائی پرفارمنس کوچ کے علاوہ بیٹنگ، بولنگ ، فیلڈنگ اور پاور ہٹنگ کوچ کے لئے درخواستیں طلب کی گئی ہیں۔

اشتہار کے مطابق کوچز نیشنل ہائی پرفارمنس سینٹر میں تعینات ہوں گے، ان کا کردار نئی نسل کے کرکٹرز پر فوکس کرنا ہوگا، کوچنگ کے خواہشمند افراد 17 جنوری تک درخواستیں جمع کرا سکتے ہیں۔

واضح رہے کہ نیشنل ہائی پرفارمنس سینٹر میں اس وقت بیٹنگ کوچ محمد یوسف تعینات ہیں، بولنگ کوچ کا عہدہ خالی ہے جبکہ وکٹ کیپنگ کا بھی کوچ نہیں ہے جبکہ عبدالمجید نیشنل ہائی پرفارمنس سینٹر کے فیلڈنگ کوچ ہیں وہ قومی ٹیم کے ساتھ تعینات ہیں۔

چیئرمین رمیز راجا نے نیشنل ہائی پرفارمنس سینٹر میں ہائی پروفائل کوچز لانے کا اعلان بھی کیا تھا ، اس کے علاوہ نیشنل ہائی پرفارمنس سینٹر سے کوچز قومی ٹیم کے ساتھ بھی ہوں گے۔

بشکریہ جنگ