لاہور: ڈیفنس میں 2 لڑکیوں سے مبینہ اجتماعی زیادتی

لاہور کے علاقے ڈیفنس میں 2 لڑکیوں سے مبینہ اجتماعی زیادتی کا واقعہ پیش آیا ہے، وزیرِ اعلیٰ پنجاب سردار عثمان بزدار نے واقعے کا نوٹس لیتے ہوئے رپورٹ طلب کر لی۔

لاہور پولیس کے مطابق 2 ملزمان نے ڈیفنس میں واقع گھر میں گھس کر لڑکیوں سے مبینہ زیادتی کی، 1 ملزم کو موقع سے گرفتار کر لیا گیا ہے جبکہ 2 فرار ہو گئے۔

پولیس کا کہنا ہے کہ واقعے کا مقدمہ متاثرہ لڑکی کی مدعیت میں درج کر لیا گیا ہے۔

درج کی گئی ایف آئی آر کے مطابق ملزمان نے 3 موبائل فون اور 45 ہزار روپے بھی چھین لیے۔

پولیس نے بتایا ہے کہ گرفتار ملزم کی شناخت کر لی گئی ہے، جبکہ متاثرہ لڑکیوں کا میڈیکل چیک اپ کرا کے واقعے کی تفتیش شروع کر دی گئی ہے۔

ادھر وزیرِ اعلیٰ پنجاب سردار عثمان بزدار نے ڈیفنس میں 2 لڑکیوں سے زیادتی پر سی سی پی او سے رپورٹ طلب کر لی۔

انہوں نے ہدایت کی ہے کہ متاثرہ لڑکیوں کو انصاف کی فراہمی یقینی بنائی جائے اور مفرور ملزمان کو جلد گرفتار کیا جائے۔

بشکریہ جنگ