اہل لاہور کو کوئی خرید نہیں سکتا، سعد رفیق

مسلم لیگ نون کے رہنما خواجہ سعد رفیق نے کہا ہے کہ اہل لاہور کو کوئی خرید نہیں سکتا، این اے 133 کے لوگ باضمیر ہیں، نون لیگ کو ووٹ دیں گے۔

مسلم لیگ نون کے رہنما سعد رفیق، عطا تارڑ، علی ملک اور خواجہ عمران نذیر نے پریس کانفرنس کی۔

اس موقع پر خواجہ سعد رفیق نے کہا کہ پرویز ملک کے خاندان نے بہت خدمات سر انجام دی ہیں، یقین ہے کہ کل پرامن پولنگ ہوگی۔

عطاء تارڑ کا کہنا تھا کہ نون لیگ نے منظم اور مؤثر طریقے سے ضمنی انتخاب کے لیے مہم چلائی، لوگ فیملی کے ساتھ ووٹ کاسٹ کریں، اس الیکشن میں پی  ٹی آئی امیدوار جمشید چیمہ نے راہ فرار اختیار کی۔

انہوں نے کہا کہ یہ الیکشن اہمیت اختیار کر چکا ہے، کیوں کہ یہ الیکشن مہنگائی اور بیروزگاری کے خلاف ریفرنڈم ہے، نون لیگ پرامن الیکشن میں ووٹ کاسٹ کرے گی۔

پریس کانفرنس کے دوران گفتگو کرتے ہوئے علی ملک نے کہا کہ کراچی کو کوڑے کا ڈھیر بنا دیا گیا ہے، لوگوں کا ووٹ خریدنے والوں کو کل جواب مل جائے گا۔

چیف الیکشن کمشنر سکندر سلطان راجہ نے کہا ہے کہ پریزائیڈنگ افسر پر کڑی نگاہ رکھنے کے لیے ان کے فونز میں ایپ ڈاؤن لوڈ کردی ہے

اس موقع پر خواجہ عمران نذیر نے کہا کہ بے نظیر بھٹو شہید ساری زندگی جمہوریت کی بات کرتی رہیں، انہوں نے ووٹ خرید کر جمہوریت کو داغدار کیا۔

بشکریہ جنگ