الیکشن کمیشن کو فنڈ نہ ملنا بڑی بلیک میلنگ ہے، سعید غنی

سندھ کے وزیر اطلاعات سعید غنی کا کہنا ہے کہ ووٹنگ مشین استعمال نہ کرنے پر الیکشن کمیشن کو فنڈ نہ ملنا بہت بڑی بلیک میلنگ ہے، حکومت اپنی مرضی کے قوانین بنانے کے لئے بضد ہے، الیکشن کمیشن کو دھمکی دی گئی ہے کہ آپ کی فنڈنگ بند کردیں گے۔

صوبائی وزیر سعید غنی نے پریس کانفرنس کرتے ہوئے کہا کہ آئین کے تحت بنائے گئے ادارے کو مفلوج بنانے کی کوشش کی جارہی ہے، چیئرمین سینیٹ کے الیکشن میں ہال میں کیمرے لگائے گئے، پھر اب حکومت کہہ رہی ہے کہ صاف شفاف الیکشن کرائیں گے۔

وزیر اطلاعات سندھ سعید غنی نے کہا ہے کہ حکمران ملک اور غریب عوام کا بیڑا غرق کررہے ہیں۔

انہوں نے کہا کہ وہ صاف شفاف الیکشن دھاندلی کی مشین کے ساتھ کرانا چاہتے ہیں، ہم الیکشن کمیشن کے ساتھ کھڑے ہیں، امید ہے اپوزیشن جماعتیں الیکشن کمیشن کو مفلوج بنانے کی سازش ناکام بنائیں گی۔

ان کا کہنا تھا کہ پیپلز پارٹی کا پشاور جلسہ بھرپور ہوا، لوگ پی پی پر اعتماد کر رہے ہیں، حالیہ دنوں میں پاکستان تحریک انصاف ( پی ٹی آئی) کے پشاور اور کے پی میں جلسے ناکام ہوئے اور پاکستان ڈیموکریٹک موومنٹ( پی ڈی ایم) کا جلسہ بھی کامیاب نہیں ہوسکا۔

وزیر اطلاعات سندھ سعید غنی کا کہنا ہے کہ وفاقی حکومت سندھ کے لوگوں کو پیپلز پارٹی کوووٹ دینے کی سزا دے رہی ہے۔

سعید غنی نے یہ بھی کہا کہ اس حکومت نے اپنی ہر نالائقی کی ذمہ داری سندھ حکومت پر ڈالنا شروع کردی، اس کابینہ میں سب نالائق ہیں، کون اتنا نالائق تھا جس نے بتایا کہ سندھ سے 16 لاکھ ٹن گندم چوری ہوگئی، حالانکہ سندھ نے 12 لاکھ ٹن گندم خریدی تھی۔

بشکریہ جنگ