شعیب اختر نے شاندار بیٹنگ پر شعیب ملک کی تعریف کردی

پاکستان کرکٹ ٹیم کے سابق فاسٹ بولر اور ٹیسٹ کرکٹر شعیب اختر نے ٹی ٹوئنٹی ورلڈکپ کے میچ میں اسکاٹ لینڈ کے خلاف شاندار بیٹنگ کرنے والے شعیب ملک کی تعریف کردی۔

اپنے ٹوئٹر پیغام میں شعیب اختر نے شعیب ملک کی دھواں دھار بیٹنگ کو سراہتے ہوئے کہا کہ شعیب ملک 40 سال کا نوجوان ہے، جو بہت ہی بہترین کھلاڑی ہے۔

شعیب اختر نے اپنے ٹوئٹر پر ایک تصویر شیئر کی ہے جس میں ایک آدمی کو خوش ہوتے دیکھا جاسکتا ہے ، سابق فاسٹ بولر کے اس ٹوئٹ کے جواب میں مداحوں کی جانب سے بھی دلچسپ تبصروں کا سلسلہ شروع ہوگیا۔

واضح رہے کہ آل راؤنڈر شعیب ملک نے پاکستان کی طرف سے ٹی ٹوئنٹی کرکٹ میں تیز ترین نصف سنچری کا ریکارڈ بنادیا۔

شارجہ کرکٹ گراؤنڈ میں اسکاٹ لینڈ کے خلاف شعیب ملک نے صرف 18 گیندوں پر اپنی یہ نصف سنچری مکمل کی۔

شعیب ملک نے اپنی اننگز میں 6 چھکے اور ایک چوکا لگایا۔

ویرات کوہلی کے ٹوئٹ پر کرکٹ کے مداحوں کی جانب سے دلچسپ تبصروں کا سلسلہ شروع ہوگیا ۔

اس سے قبل پاکستان کی طرف سے تیز ترین نصف سنچری کا ریکارڈ عمر اکمل کے پاس تھا۔

عمر اکمل نے ایجبسٹن کے مقام پر آسٹریلیا کے خلاف 21 گیندوں پر نصف سنچری بنائی تھی۔

واضح رہے کہ شعیب ملک اس سے قبل 23 گیندوں پر دو مرتبہ ٹی ٹوئنٹی انٹرنیشنل میں نصف سنچری بناچکے ہیں۔

انہوں نے پہلے 2017 میں اسکاٹ لینڈ کے خلاف جبکہ دوسری مرتبہ 2018 میں سری لنکا کے خلاف یہ کارنامہ انجام دیا تھا۔

بشکریہ جنگ