کراچی: کار اور بائیک لفٹرز سمیت 8 ملزمان گرفتار
کراچی میں پولیس کی جانب سے مختلف کارروائیوں اور مقابلوں کے نتیجے میں 2 زخمیوں سمیت 8 ملزمان کو گرفتار کر لیا گیا ہے، جن میں کار اور موٹر سائیکل لفٹرز بھی شامل ہیں۔
ایس ایس پی اے وی ایل سی بشیر احمد بروہی کے مطابق گلشنِ اقبال میں عزیز بھٹی پارک کے قریب چوری کی کاروں کی اطلاع پر ناکہ بندی کی ہوئی تھی کہ اس دوران کار لفٹرز سے مقابلہ ہوا جس کے نتیجے میں 1 زخمی کار لفٹر سمیت 3 انتہائی مطلوب کار لفٹرز کو گرفتار کر لیا گیا۔
انہوں نے بتایا کہ گرفتار ملزمان کاریں چوری کر کے پنجاب اور بلوچستان میں فروخت کرتے تھے۔
ملزمان ساجد، بلال اور جرمان کے قبضے سے 4 چوری کی کاریں اور اسلحہ برآمد کیا گیا ہے۔
پولیس کے مطابق کورنگی انڈسٹریل ایریا بلال کالونی سے 3 موٹر سائیکل لفٹرز کو گرفتار کر لیا گیا ہے جن کے قبضے سے اسی علاقے سے چوری کی گئی موٹر سائیکل ملی ہے۔
ملزمان رمضان، علی نواز اور سیفل موٹر سائیکلیں چوری اور چھین کر سستے داموں بیچتے تھے۔
گرفتار تینوں ملزمان کو 2 متاثرہ شہریوں نے شناخت بھی کر لیا ہے۔
ادھر شاہ لطیف ٹاؤن میں پولیس اور ڈاکوؤں کے درمیان مبینہ فائرنگ کے نتیجے میں زخمی ڈاکو سمیت 2 ملزمان کو گرفتار کر لیا گیا۔
ملزمان وارث اور افضال کے قبضے سے اسلحہ، چھینا گیا موبائل فون، 5 ہزار روپے کیش اور چوری کی موٹر سائیکل ملی ہے۔
Comments are closed.