سیمی فائنل میں جو بھی ٹیم سامنے آئی اُسے شکست دیں گے، شاداب خان

قومی ٹیم کے آل راؤنڈر شاداب خان نے کہا ہے کہ سیمی فائنل میں جو بھی ٹیم سامنے آئے گی اُسے شکست دیں گے۔

دبئی میں میڈیا ٹاک کے دوران شاداب خان نے کہا کہ ہمارا فوکس صرف کرکٹ اور اپنی ٹیم پر ہے، ہم اپنی ٹیم کی اسٹرینتھ کو دیکھ رہے ہیں، یو اے ای میں ہم نے بہت کرکٹ کھیلی ہے، جس کا فائدہ ہورہا ہے۔

قومی آل راؤنڈر نے مزید کہا کہ ورلڈ کپ میں کوئی ٹیم چھوٹی بڑی نہیں ہوتی، سب ٹیمیں بھر پور تیاری کے ساتھ آتی ہیں۔

اُن کا کہنا تھا کہ آٹھ دس کھلاڑی کئی سالوں سے ایک ساتھ کھیل رہے ہیں، جس سے ٹیم میں مستقل مزاجی آرہی ہے۔

شاداب خان نے کہا کہ جیت کے سفر کو جاری رکھیں گے، ٹی20 کرکٹ میں 11 کے 11 کھلاڑی پرفارم نہیں کرتے۔

انہوں نے کہا کہ حسن علی اس طرح پرفارم نہیں کررہا، لیکن ہمیں اس پر اعتماد ہے، کرکٹ گیم ہے، سب ایک دوسرے کی مدد کررہے ہیں۔

قومی آل راؤنڈر نے یہ بھی کہا کہ جب کھلاڑی اسٹار بن جاتے ہیں تو اس کا پریشر بھی ہوتا ہے، اسکاٹ لینڈ کے خلاف میچ میں بھی پریشر ہے۔

اُن کاکہنا تھا کہ ایونٹ کے آغاز سے جو فلو ملا اس کو فائنل تک برقرا رکھیں گے، پاکستان ٹیم کی کور عمدہ پرفارم کررہی ہے، اس سے ٹیم کو بوسٹ مل رہا ہے۔

بشکریہ جنگ