کے پی میں اگلے ہفتے سے چینی 90 روپے کلو بکے گی: محکمۂ خوراک

محکمۂ خوراک نے خوش خبری سنائی ہے کہ اگلے ہفتے 10 ہزار میٹرک ٹن چینی خیبر پختون خوا میں پہنچائی جائے گی، جس کے بعد اس کا سرکاری نرخ 90 روپے فی کلو ہو گا۔

محکمۂ خوراک کی جانب سے خیبر پختون خوا میں چینی کی تقسیم سے متعلق اعلامیہ جاری کیا گیا ہے۔

اعلامیئے میں کہا گیا ہے کہ خیبر پختون خوا کو اگلے ہفتے 10 ہزار میٹرک ٹن چینی پہنچائی جائے گی۔

قیمتوں میں اضافے کے بعد ملک کے سب سے بڑے شہر کراچی میں چینی کہیں 120 روپے تو کہیں 150 روپے فی کلو میں فروخت ہونے لگی، جبکہ بلوچستان کے دارالخلافہ کوئٹہ میں چینی 155 روپے فی کلو میں بکنے لگی۔

محکمۂ خوراک کا اعلامیئے میں کہنا ہے کہ تمام اضلاع میں آبادی کے تناسب سے چینی کی تقسیم کی جائے گی۔

اعلامیئے میں محکمۂ خوراک کا یہ بھی کہنا ہے کہ اگلے ہفتے سے چینی کا سرکاری رعایتی نرخ 90 روپے فی کلو ہو گا۔

بشکریہ جنگ