سیمی فائنل کیلئے کوالیفائی کرنا حیرت انگیز احساس ہے: آصف علی

ٹی ٹوئنٹی ورلڈ کپ کے دو اہم میچز میں شاندار چھکے مار کر ٹیم کو فتح دلوانے والے قومی کرکٹر آصف علی نے سیمی فائنل میں کوالیفائی کرنے پر شائقین کرکٹ کے لیے سوشل میڈیا پر خصوصی پیغام جاری کیا ہے۔

آصف علی نے اپنے تصدیق شدہ ٹوئٹر اکاؤنٹ پر قومی کرکٹ ٹیم کی تصویر شیئر کی جس میں کپتان بابر اعظم قومی پرچم کو دیکھ رہے ہیں۔

ٹوئٹر پر تصویر شیئر کرتے ہوئے آصف علی نے سیمی فائنل کے لیے کوالیفائی کرنے پر سب سے پہلے اللّہ تعالیٰ کا شُکر ادا کیا۔

آصف علی نے شائقین کرکٹ سے مخاطب ہوتے ہوئے لکھا کہ ’آپ کی دعاؤں اور سپورٹ سے ٹیم پاکستان نے سیمی فائنل کے لیے کوالیفائی کر لیا ہے۔‘

اُنہوں نے لکھا کہ ’یہ ایک حیرت انگیز احساس ہے، ہمیں اپنی دعاؤں میں رکھیں۔‘

قومی کرکٹر نے مزید لکھا کہ ’اللّہ تعالیٰ ہمیں عزت اور کامیابی سے نوازے۔‘

واضح رہے کہ مینز ٹی ٹوئنٹی ورلڈکپ 2021 میں پاکستان نے گروپ اسٹیج میں اپنی مسلسل چوتھی کامیابی کے بعد ایونٹ کے سیمی فائنل کے لیے کوالیفائی کرلیا ہے۔

ٹی ٹوئنٹی ورلڈکپ میں افغانستان کے خلاف میچ میں ناقابلِ شکست اننگز کھیلنے والے قومی کرکٹر آصف علی نے سابق بھارتی کرکٹر ایم ایس دھونی کا اسٹائل اپناکر اُن کے کرکٹ کے دنوں کی یاد تازہ کردی۔

گروپ 2 کے اس میچ میں پاکستان نے بابر اعظم اور محمد رضوان کی شاندار بیٹنگ کی بدولت نمیبیا کو جیت کے لیے 190 رنز کا ہدف دیا تھا جس کے جواب میں حریف ٹیم مقررہ 20 اوورز میں 5 وکٹوں کے نقصان پر 144 رنز بناسکی۔ 

بشکریہ جنگ