دبئی ایکسپو پاکستان کیلئے دنیا تک رسائی کا بہترین موقع ہے: صدرِمملکت
صدرِ مملکت ڈاکٹر عارف علوی کا کہنا ہے کہ دبئی ایکسپو پاکستان کو دنیا تک رسائی کا بہترین موقع دے رہی ہے۔
خلیجی اخبار سے گفتگو کے دوران صدرِ مملکت ڈاکٹر عارف علوی نے کہا کہ دبئی ایکسپو میں ہماری فعال موجودگی جیو اکنامکس پر توجہ کی علامت ہے۔
ان کا کہنا ہے کہ دبئی ایکسپو میں پاکستانی پویلین کا مقصد ملک کے مثبت رخ اور ثقافتی ورثے کو ظاہر کرنا ہے، پاکستان یو اے ای برادرانہ تعلقات میں پیش رفت ہوئی ہے۔
صدرِ مملکت ڈاکٹر عارف علوی نے کہا کہ خلیجی ممالک سے مضبوط اور کثیر الجہتی تعلقات پاکستان کی خارجہ پالیسی کا مرکزی حصہ ہیں۔
انہوں نے زور دیا کہ پُر امن افغانستان علاقائی رابطوں، اقتصادیات اور ترقی کے لیے ضروری ہے، پرُ امن اور مستحکم افغانستان پاکستان کے مفاد میں ہے۔
صدرِ پاکستان ڈاکٹر عارف علوی کا مزید کہنا ہے کہ افغانستان میں امن کا سب سے بڑا خواہش مند پاکستان ہے، وہاں استحکام اور دیرپا امن کے لیے عالمی برادری کا تعمیری کردار ضروری ہے۔
انہوں نے خلیجی اخبار سے گفتگو میں یہ بھی کہا ہے کہ افغانستان میں انسانی بحران سے بچنے کے لیے بھی عالمی برادری کا کردار ضروری ہے۔
واضح رہے کہ صدرِ مملکت ڈاکٹر عارف علوی آج متحدہ عرب امارات کے 2 روزہ دورے پر روانہ ہوں گے۔
دورۂ یو اے ای کے دوران صدرِ پاکستان دبئی ایکسپو میں پاکستان پویلین کا افتتاح کریں گے، وہ عرب امارات کے معززین سے ملاقات بھی کریں گے۔
صدر عارف علوی متحدہ عرب امارات میں کاروباری افراد، سرمایہ کاروں، آئی ٹی کمپنیوں اور میڈیا کے نمائندوں سے بھی ملاقات کریں گے۔
Comments are closed.