کچھ عرصےمیں کورونا کی صورتحال بہتر ہوجائے گی: ڈاکٹر یاسمین راشد

وزیر صحت پنجاب ڈاکٹر یاسمین راشد نے کہا ہے کہ امید ہے کچھ عرصےمیں کورونا وائرس کی صورتحال بہتر ہوجائے گی۔ 

اپنے ایک بیان میں ڈاکٹر یاسمین راشد نے کہا کہ پنجاب میں تقریباً ساڑھے 6 لاکھ یومیہ اوسطاً ویکسینیشن کی جارہی ہے، کوشش کررہے ہیں کہ ویکسینیشن کی سہولت گلی گلی تک پہنچائیں۔

ڈاکٹر یاسمین راشد نے کہا کہ یونین کونسل کی سطح پر کوشش کررہے ہیں کہ لوگ ویکسینیشن کرائیں اور اب تک پنجاب میں 3 کروڑ 41 لاکھ لوگوں کی ویکسینیشن ہوچکی ہے۔

نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق پاکستان میں گزشتہ 24 گھنٹوں کے دوران کورونا وائرس کے مزید 3 ہزار 613 کیسز سامنے آئے ہیں، مزید 57 افراد اس موذی وباء کے سامنے زندگی کی بازی ہار گئے، اس کے مزید3 ہزار 438 مریض شفایاب ہو گئے، جبکہ مثبت کیسز کی شرح 6 اعشاریہ 32 فیصد ہو گئی۔

اُنہوں نے کہا کہ کوشش ہے کہ اتوار کو صرف دوسری ڈوز کے لیے مختص کردیں، زندگی معمول پر لانے کے لیے ویکسین ضروری ہے۔

ڈاکٹر یاسمین راشد کا مزید کہنا تھا کہ ماسک پہن کر وبا سےتقریباً 70 فیصد تک بچا جا سکتاہے۔

بشکریہ جنگ